Tukin khan Pre-season match-ah Manchester United leh Real Madrid an inhmachhawn, hun pangngaiah 1-1 in an inhnehtawk a, penalty shootout hmanga chak zawk zawn a ni a, United chuan 2-1 in hnehna an chang.
Santa Clara-ah hian stadium khat thap mipui an pungkhawm, first half hun tawp dawn 45 mins-ah mual veilam sir atangin Martial chuan ball turu lutukin a lalut, lei hrulah a cross a, box chhunga lo awm Lingard chuan awlsam takin a pet goal.
Second half 69 mins-ah penalty atangin Casemiro chuan Real Madrid si phurh a rul a. Victor Lindelof-a'n box chhunga Theo Hernandez a tihtluk vang a ni a, h un pangngaiah 1-1 in an inhnehtawk, penalty an pet ta a.
Mi 10 laiin penalty an pet, goal thum chiah a lut! Hemi chungchang hi Mourinho chuan, "Penalty 10 atanga goal thum chiah chu a tlem deuh alawm, engpawh nise pre-season a ni e. Tin, ka penalty pet thiam ka thlang lo bawk alawm," tiin a sawi.
Manchester United boss Jose Mourinho chuan, "Training session tha tak a ni e, first half phei kha chu anni pawhin an player neih that ber ber an rawn thawhchhuak a, duhthusam a ni e.
"Second half-ah erawh an player naupang an rawn khelh tir a, an player tha ber ber an khelh tir tak lovah kha chuan keini pawh kan phur tawh lo a nih kha.
"Inhliam kan nei, Herrera a inhliam hlauh mai, engtiang chiaha hliam nge ka hre lo, mahse a rawn chhuah hma dan em em ah khan a na tih chu a hriat a nih kha," tiin a sawi.