Kalinic-a’n World Cup medal a dawn duh loh chhan a sawi

14th August 2018, 02:08AM

Croatia striker Nikola Kalinic chuan Russia rama World Cup-ah khan medal a dawng ve duh lo a, medal a lak duh loh chhan kha a sawi fiah.

Nikola Kalinic hi Nigeria nen an inkhelh tumin coach Zlatko Dalic chuan bul a tantir lo a, second half-ah coach chuan luhtir a tum a, mahse Kalinic hi a lut duh ta lo a. Hetianga coach thu a hnial avang hian Russia atangin Dalic chuan a thawn haw nghe nghe a ni.

World Cup final-ah Croatia chuan France chu 2-4 in an hneh ta lo a, Kalinic tel lo pawhin pahnihna an ni ta tho a. Pahnihna medal hi Kalinic pek an tum a, mahse a dawng duh ta lo a. World Cup final thleng thei turin engmah a tih ve loh thu a sawi a, medal dawn a phu ve loh thu a sawi.

Kum 30-a upa Kalinic hian AC Milan ah beisei a pha lo hle a, Serie A ah goal 6 chauh a thun a. A tan vanneihna a inher chhuah beiseiin Spain lam a pan a, Atletico Madrid a zawm a. La Liga club hian Kalinic hi €15 million velin an lei a, an hnena kum thum awm turin contract an ziahpui a ni.

Thawhtannia Atletico in an tlangzarhnaah Kalinic chuan, “World Cup-a thil thleng kha chu a nih dan tur a ni vek tawh a. Coach khan min ring zo lo a ni tih kha ka pawm thlap a ni,” a ti.

A sawi zelnaah, “Tournament chhung khan team tan tih ka nei ve lem lo a, kha vang khan medal pawh kha ka dawng duh ta lo a ni a. Team hlawhtlinna pawh ka tawmpui chuang hek lo a, kha thil thleng kha chu kalsan a hun tawh viau a ni,” a ti bawk.

A club thar zawm chungchang sawiin, Diego Simeone hnuaiah tlar hma lamah Diego Costa leh Antoine Griezmann te nen hmun an inchuh a ngai dawn a. “Europe khawmualpuia forward tha ber ber pahnih an awm a, anni hi ka zah a, ka ngaisang hle a. Anni te nen hian hmun chan tumin theihtawp kan chhuah dawn a ni a, season bul kan tan dawn chauh a, team tan hian thil tam tak ka tih ve theih ka beisei a ni,” a ti.

“Helaiah chuan tu te pawh hi an thawkrim hle a ni tih ka hria a, chutiang chu kei pawhin ka inhuam hle a. Helai hmunah hian thil ropui tak tak hlen chhuah theih ka duh a. He team hi ka lo thlithlai hnem ta hle a, an training neih dan thlengin ka re tawh a. An bula ka awm thei hi ka phur tak zet a ni,” a ti bawk.

Copyright © inkhel.com 2024. All rights reserved.