Barcelona forward Lionel Messi chu a kal (Kidney)-ah harsatna a neih avangin thawhtanni khan test neih a ni a, training-naah a inlan thei ta lo a ni.
Nikum December thla khan Messi hian kala lungte awm ang chi natna a neih avangin enkawl a lo ni tawh a. Mahse Fifa Club World Cup final-ah erawh a inlan thei ta tho a nih kha. Tin, kumina Barca league game-ah pawh a la inlan chho leh zat zat a, nimin khan enfiah a ni leh ta a ni.
Barcelona chuan thuchhuah siamin,"Kum 28 mi Messi chuan nilaini atang hian a hna pangai a zawm leh dawn a, Barcelona striker Lionel Messi hian thawhtanni leh thawhlehni hian kal lama harsatna a neihte enfiahna hun a nei dawn a ni." tiin.
Messi hian tun season La Liga match 17 atangin goal 12 lai a khung leh tawh a, Barcelona chu table-ah point 3-in hma a hruai pui mek a, Pathianni khan si hnih faiin Levante an hneh a, kha match-ah pawh khan 90 mins a khel nghe nghe a ni. Nilaini lo awm turah hian Barcelona chuan Copa del Rey semi final 2nd leg an khel leh dawn a, 1st leg-a 7-0 laia an sawp Valencia an hmachhawn leh dawn a ni.
source : bbc