Ka thlen chinah ka lungawi - Mason

15th February 2018, 01:02AM

Lu ruh hliam hlauhthawnawm tak avanga inkhelh chawlhsan ta Ryan Mason chuan khelmuala hun hman leh a in besei hle tih a sawi a, inkhel thei tawh dawn lo mahse a thlenchinah a lungawi tih a sawi bawk.

Kum 26 mi Mason hian a hiam vang hian zai a tawk tawh a, inkhel leh thei tura beisei ni mahse mithiamte thurawn angin chawlh a puang ta zawk.

A hliam hi nikum January thlaa Chelsea leh Hull City an hmachhawn țumin a nei a, corner ațanga ball kal tauh an tumna lamah Chelsea defender Cahill nen an intauh.

A hliam hnu hian hmanhmawh takin zai nghal a ni a. damdawi inah kar khat chuang a awm nghe nghe.

A hliam hi endik a nih hnuah an rin aiin alo nasa tih hriatchhuah a ni a, amah pawh hian khelmuala hun hman leh thuai a in beisei hman hle.

Mason chuan, "CT scan hmanga endik anihna kha kar tlemte liamta khan a ni a, tunah chuan engkim a danglam zo tawh. Scan hma kha chuan 100% in khelmuala kir leh ka tum a ka kir leh ngei pawh ka inring.

"Fapa leh kawppui duhawm tak ka nei a, thil pangngai taka kalpui tur chuan chhungte hi football aiin an pawimawh zawk." tiin a sawi.

Mason hian kum 2016 khan Tottenham ațangin Hull City a zawm a, amanah Hull hian £13m sengin Premier League-ah game 69 a khel hman.

Sawi chhunzawmin Mason chuan, "Inkhelh leh chakawm viau mahse thil hlauhawm tak a ni tawh a, chawl tura thutlukna ka siam hi thutlukna dik a ni a ka inchhir lo bawk ang.

"Ka thlenchinah ka lungawi a, ka suangtuahnaah chengin ka duh ang zawng zawng ka hlawhchhuak bawk. Hmalam hun atan ka phur hle a tih tur tam tak la nei niin ka in hria.

"Ka 26 mi chauh ni a inkhelh chawlhsan hi a danglam a ka la naupang hle bawk. Ka hma huna tih tur ka thlanah ka thawkrim ang a; ka hlawhtling dawn tih pawh ka hria. A chhan chu ka inpe pumhlum tawp dawn a thil phurawm tak a ni.

"Ka hma huna tih tur awmah hi football kaihhnawih a ni dawn tih pawh ka chiang a, a chhan chu football hi ka nunna anih bakah ka hmangaih a ka hmangaih zel bawk ang." tiin a beidawng lo.

Mason hian England tan pawh game khat a khel hman a, ram tana a khelh chhunah hian Italy an hmachhawn a si khat ve ve inpe in an inhnehtawk.

Copyright © inkhel.com 2024. All rights reserved.