A zawnin Old Trafford-ah game 4 ngawt an khingpui an inhnehtawkpui hnu Nilaini khan EFL Cup-ah 4-1 laiin West Ham an sawp. Anthony Martial leh Henrikh Mkhitaryan an che tha dun hle.

Game mawi tak takin khel thin mahse goal erawh an khung hleithei lo, an duhthusam results an hlawhchhuak thei lova, Jose Mourinho-a tan pressure a sang thin hle.

A zawna Old Trafford-a an khingpui vawi 4 ngawt an inhnehtawkpui khan shots vawi 91 lai an nei a, chutih laiin goal 3 chiah an khung. Ball chang hnem em em mahse hnehna an chang thei chuang lo a nih kha.

"Hetiang em ema ball chang hnem team dang ka la enkawl lo, hetiang em ema chance siam hnem team dang ka la enkawl lo.

"Chutih laiin hetianga khingpuite inhnehtawkpui hnem team dang ka la enkawl lo. He team hian hnehna chang zel turin theihna a nei. Chutiang tur chuan Nilainia kan inkhelh dan ang khan kan khelh a ngai thin dawn a ni.

"Khatiang kha season tluana khelh kan duh dan a ni. Manager tin hian tum leh duhdan an nei, player ten an puih that leh that lovah a innghat.

"United ang club liana ka kal dawn khan ka rilruah thil pakhat a awm, hetiang ang club lian hi chuan football khelhphung bik an nei thin a, chu tak chu a ni ka lawmna em em chu," tiin Jose Mourinho chuan MUTV a hrilh a ni.

Picture credit : Getty