Juve ropui zanah Milan an chak zo lo

23rd October 2017, 05:10AM

Serie A-a champion lai Juventus chuan Napoli an um chhunzawm zel a, Pathianni zan khan Stadio Friuli-ah 6-2 in Udinese an sawp.

Juve tan hian Sami Khedira chuan goal thum a khung a, Daniele Rugani leh Miralem Pjanic-te'n goal khat ve ve an khung bawk a an goal khat dang hi Udinese defender Samir Santos-a'n an lama a tih luh a ni thung.

Stadio Friuli-a inkhelah hian Juventus striker Mario Mandzukic chu referee thu a hnial avangin minute 26-naah hnawhchhuah a ni bawk.

Juve hian point 22 neiin pathumna dinhmun an hauh mek a, pakhatnaa awm mek Napoli nen an inthlauhna chu point thum ala ni.

Juve an chak chianlai hian AC Milan-in point thum an hlawhchhuak zo lo va, San Siro-ah Genoa mikhualin chak zawk an awm lo va an inhnehtawk.

He inkhelah hian Milan defender Leonardo Bonucci chu hnawhchhuah a ni a, Italian defender hian a kiu in Genoa defender Aleandro Rosi a nghawk a referee-in a hnawtchhuak.

Milan hian nipui transfer hunlaiin player lei nan £175m seng mahse beisei an pha tak tak thei lo va, season bulțan țha mahse an chak hleithei tawh lo va Serie A-ah 11-na an ni mek.

Champions League khel zo hlim AS Roma-in an mikhualna mual Olimpico di Torino-ah 1-0 in Torino an hneh a, Roma tan hian Serbian defender Aleksandar Kolarov chuan goal khungin point thum an hlawhchhuak.

Eusebio di Francesco enkawl mek Roma hian pangana dinhmun an hauh pha ta a, hmahruai mektu Napoli nen an inkarah point 7 ala awm.

INKHEL DANG RESULT:

Chievo 3-2 Hellas Verona

Atalanta 1-0 Bologna

Benevento 0-3 Fiorentina

SPAL 0-1 Sassuolo

Copyright © inkhel.com 2024. All rights reserved.