Kum khat chuang hret kaltaa a inhnek hnuhnung bera chak lo Manny Pacquiao chu ring chhungah a lut leh dawn hnai a. Ruahman anga thil a kal a nih chuan July 14 khian Kuala Lumpur, Malaysia-ah Pacman hian welterweight world title holder Lucas Matthysse a hmachhawn ang.

Golden Boy Promotions CEO Oscar De La Hoya chuan Manny Pacquiao leh Lucas Matthysse te inhnek tur hi a chiang tawh tih sawiin, Lucas hian a kawnghren kawl lai chu a dahkham dawn tih a sawi bawk.

Pacquiao adviser Michael Koncz chuan April 18 khian Manila khawpuiah chanchinbumi hmaah an inlan dawn tih sawiin, hemi hnu April 20 ah Kuala Lumpur lamah an inlan nawn leh dawn tih a sawi bawk.

Pacman hian hun rei tak atanga a lo hman tawh, trainer lar, International Boxing Hall of Fame ah pawh tel pha Freddie Roach chu a hmang tawh dawn lo a. Pacquiao hian Roach aiah Buboy Fernandez a hmang a. Buboy hi Pacquiao thian tha tak niin, a inhnek apianga tawiawmtu a nih bakah assistant trainer a ni ngar ngar bawk a ni.

Kum 35-a upa Matthysse (39-4, 36 KOs) hi Argentina mi niin, January 27 khan welterweight title pahnihna a la a, hemi tum hian Thailand boxer hriat hlawh lutuk lem lo Tewa Kiram chu round 8-naah a knock-out a ni.

Kum 39 mi Pacquiao (59-7-2, 38 KOs) hi Philippines ah chuan senator a ni mek a, boxing khawvelah chuan division 8 a world champion ni thei awm chhun niin, Horn a hneh loh hnuah boxing chawlhsan a tum zet a, rawn let leh hi a tum tha leh ta a ni.