India rama footballer intel khawm pawl, Football Players Association of India (FPAI) leh Mizoram XI-te chu July 1, 2017 hian Aizawlah an inkhel dawn, he inkhel tur hi FPAI leh Mizoram Football Association tangkawpin an buatsaih a ni.

FPAI hian July 1 zan hian FPAI Awards an sem nghal dawn a, MFA nen he hun pawh hi an buatsaih dun dawn a ni. FPAI lamah hian Indian player tha an fuan khawm dawn a, MFA lamin Mizoram XI team thlangin Mizo player tha rual an awm khawm ve thung ang.

Tun chinah FPAI aiawha khel turin heng player langsar tak takte hian an tichiang tawh a, chu'ng zingah chuan Liberia national team-a khel tura kohna dawng Alfred Jaryan pawh a tel a, Aizawl FC captain hian FPAI tan a khel ang.

Hei bakah hian Newcastle United leh Sunderland tan pawha khel tawh, England tana age group hrang hranga lo inlan tawh Michael Chopra pawh a lo tel dawn. England rama Professional Footballers' Association Team of the Year-a vawi hnih lai tel tawh Michael Chopra hian Cardiff City tana a khelhlaiin hming a chher a, Sunderland-in pound maktaduai 5 zetin an lo lei tawh a ni. England tan Under 16, Under 17, Under 19 leh Under 20-ah a lo khel tawh a, amah hi Indian thisen kai a ni nghe nghe a, tuna a inziah luhna chu ISL-a Kerala Blasters-ah a ni.

FPAI player turte hi an zavaiin a la hriat kim loh deuh a, tuna hriat theih chinte chu :

Debjit Majumdar, Mohammad Rafique, Gouramangi Singh, Pritam Kotal,!Deepak Mandal, Alfred Jayran, Narayan Das, CK Vineet, Renedy Singh, Michael Chopra,Eugeneson Lyngdoh, Subrata Paul, Jewel Raja-te an ni.

Mizo player hrang hrang, ISL leh I League-a kan hmuh thinte leh tualchhunga player tha thlan khawmte chu Mizoram XI hmingin an inlan thung ang.