November ni 5, 2016 zan khan Mizoram University Multipurpose Hall-ah Mixed Martial Arts Event lian JSJ Fight League 2&3 chu hlawhtling taka neih a ni a, a hmun hi a hlain ruah nasa takin sur bawk mahse MMA fans Hall khat tlatin an pungkhawm tho a ni.

He Event hi session hniha then a ni a, session hmasa zawkah JSJ Fight League 2 neih a ni a, session hnuhnung zawkah JSJ Fight League 3 neih a ni. Bouts 15 khelh a ni a, JSJ Fight League 3 main event-ah Manipur fighter Roshan Luwang chuan Round 2-na minute 2 leh second 47-ah Rear naked choked-in Zorinmawia a hneh a, he match-ah hian Zorinmawia hian a khupah hliam na tak a tuar nghe nghe a ni.

Roshan Luwang hi wrestler a nih angin ground-ah a tha hle a, Zorinmawia hi stand up-ah a tha a, a strike pawh tha thin hle mahse Roshan hian ground khelhpui tumin a bawh nghal buan buan a, Zorinmawia hian a game a khel thei tak tak lo, Round 2-naah Roshan hian a rek bet a, Zorinmawia a tlawm ta a ni.

JSJ Fight League 3 Co-Main event-ah Zorammawia a che ropui hle a, second 16 chhung lekin a khingpui Bengal fighter Aaqib Maqsood chu Technical Knock Out-in a hneh a. Zorammawia hnek hi a na hle a, Aaqib Maqsood hi amah aia sang ni mahse chiang taka a hnek fuh hnuah ground-ah an inbei zui a, Aaqib Maqsood a che thei tawh lo, Zorammawia chuan a hnek chhunzawm nghal mawlh mawlh a, referee Samuel Lalrozama chuan match a ti tawp ta a ni.

JSJ Fight League 2 Main Event pawh mipuiin an hlut hle. Ngursaimawia chuan Bangladesh fighter Md Abu Sayed chu Round 3-ah Technical Knock Out-in a hneh a. Aaqib Maqsood hi fighter tha tak a ni a, mahse a vannei thin hle, Round 1-ah Ngursaimawia'n a knock out tep, mahse hun a tawp hman, Round 2-ah pawh a knock out leh tep a, hun in a lo chhan leh hman hram. Round 3-ah erawh Ngursaimawia chuan a hneh ta nge nge, clear punch a neih hnuah a lut chhunzawm a, na taka a khawih hmain referee a inrawlh hman, TKO-in Ngursaimawia a chak ta a ni.

JSJ Fight League 2 Co-Main Event-ah Ngurlianzuala chuan unanimous decision-in a khingpui Meghalaya fighter Johny Raymnong a hneh a. Heavyweight match-ah hian Fighter pahnihte hian Round 3 an khel a, a tawpah Ngurlianzuala a chungnung ta zawk a ni. JSJ Fight League 3-ah hmeichhe fighter an inlan a, straweight category-ah Lalruatfeli chuan Unanimous Decision-in K. Lalrinpuii a hneh a ni.

Fight hmuhnawm tak tak a awm a, Bantamweight-ah Dengthanchhunga chuan second 37 chhungin a khingpui PC Vanlalthuammawia a knock out a. Welterweight-ah Lalthasanga Lelhchhun chuan Minute 2 leh second 16 -ah a khingpui C. Lalsangliana a rek tlawm bawk. Flyweight-ah Pathianmalsawmdawngliana khel a hmuhnawm hle a, Benjamin-a nen an inhmachhawn a, Benjamin-a a fakawm hle, street fighter niin a tuarchhel hle a, hmai thi hnuang chung pawhin a khingpui Pathianmalsawmdawngliana a pan nget nget, mahse unanimous decision-in Pathianmalsawmdawngliana a chak ta zawk a ni.

He event-ah hian Home Minsiter Pu R. Lalzirliana chu khuallian niin Mizoramah hetiang fight hmuhnawm a awm hi lawmawm a tih thu a sawi baka fighter-te tan eizawnna zau tak a inhawn avanga a phur thu a sawi bawk a, Pu Zira hi Mizoram Mixed Martial Arts Association Patron Member-ah a inpe nghal nghe nghe a ni. JSJ Fight League hi JSJ Fitpro sponsor niin, Samsung 3:16 Plan Solution chu co-sponsor a ni a. MISMA leh Zonet-ten inremna an neih angin he event hi Zonet chuan Live-in an broadcast bawk a ni. Lights & Sound-ah Delta chuan tha an thawh a, lights system ropui tak chuan event a ti pui hle nghe nghe a. Tin, JMB Security ten he event hi enkawlin programme duan ang thlapin engkim a kal theih phah bawk a ni.

JSJ Fight League 2 Results -

1. Lightweight : C. Lalfakawma def. Lanlalnunpuia (TKO)

2. Feartherweith : Obeda Vanlalhmangaiha def. Remruatsanga Ralte (Rear Naked Choked)

3. Bantamweight : PC Vanlalthuammawia def. Lalramdinthara (Split Decision)

4. Flyweight : Pathianmawlsawmdawngliana def. Lalbiaksanga (Unanimous Decision)

5. Welterweight : C. Lalsangliana def. C. Lalfamkima (TKO)

6. Heavyweight : Ngurlianzuala def. Johny Rymnong (Unanimous Decision)

7. Flyweight : Ngursaimawia Sailo def. Md Abu Sayed (TKO)

JSJ Fight League 3 -

1. Pathianmawlsawmdawngliana def. Benjamin Laltlankima (Unanimous Decision)

2. Featherweight : Remruatsanga Ralte def. Lalchhuanmawia (Rear Naked Choked)

3. Lightweight : Rosangzuala def. C. Lalfakawma (Unanimous Decision)

4. Bantamweight : Dengthanchhunga def. PC Vanlalthuammawia (KO)

5. Welterweight : Lalthasanga Lelhchhun def. C. Lalsangliana (Submission)

6. Straweight : C. Lalruatfeli def. K. Lalrinpuii (Unanimous Decision)

7. Welterweight (Pro) : Zorammawia def Aaqib Maqsood (TKO)

8. Bantamweight (Pro) : Roshan Luwang def. Zorinmawia (Rear Naked Choked)