John Stones hi a thiamna leh theihna baka media-te fak uchuak a ni thei mai angem? Nizan Champions League-a goal 3 ngawt an chhuah danah pawh khan Manchester City defender-te an khawng tawk lo tih a chiang.
Jose Mourinho khan Chelsea a enkawl laiin Everton atangin Stones hi lak a tum a nih kha, theih tawpin lakchhuah tum mahse an phalsak lova. Manchester City lamin £47.5million laiin August ni 9, 2016 khan an lei a nih kha.
Chelsea-in an lakluh duh ber chu John Stones kha ni mahse Conte chuan an duh ber pahnihna a ni tawh mai ang chu, David Luiz chu August ni 31 khan PSG atangin Stamford Bridge-ah a hruai haw leh.
Kum 22 mi lek John Stones hi a man a to em avangin amahah beiseina a sang hle, partner a nei tha lo pawh a ni thei, chutih laiin amah pawh hian tihsual a nei ve ta nual a, tun season Premier League-ah a tihsual avanga an lama goal ta vawi 3 a awm a, a tihsual chiang tak goal an chhuah phah tepna vawi 3 a awm bawk. Champions League-ah tihsual chiang tak vawi khat a nei bawk.
Tun season Premier League-ah pahnihna an ni mek a, goal 29 lai an chhuah tawh, hmahruaitu Chelsea chuan goal 20 an chhuah a, table-a 6-na Manchester United chuan goal 22 an chhuah tawh. Stones hian tun season League game 22 khel tawhin, an defending phui that tawk loh chungchangah hian mawh la tur zawng ta ila, ani hi mawhpuh tur ber ni lo mahse; mawhphurtu lian zing ami chu a ni chiang mai.
Champions League atanga Monaco-in an pet chhuah dan chungchangah pawh dem a hlawh hle a, goal thum lai an chhuah, goal hnihnaah khan khatia ball a chhuah mai kha a goal phah ta kha a ni a, goal thumna an chhuah danah erawh a mawhphurtu ber ni lo mahse Manchester City defending a that loh zia a lang chiang a, City defending a chhiat thu sawi a nih rual hian loh theih lova dem hlawh nghal chu player man to Stones a ni ta a ni.
Engpawh nise Stones hi defender chhia a ni lova, kawppui tha zet chu nei selang chuan tun ai hian a la khel tha thei tura ngaih a ni a. A man kha a to em a, a man atangin an teh tawh si bawk nen, a man atanga chhut chuan a khel tha tawk lo, chutih laiin a kum leh a khelh dan en chuan defender tha tak erawh a ni.