18 Dec 2016 04:10

PC Lala

inkhel correspondent and photographer

Jeremy-a'n Gold leh Silver Medal a la

Commonwealth Youth Games-a gold medal latu, IWF World Youth Weightlifting Championship leh Asian Youth Weightlifting Championship-a silver medal latu Jeremy Lalrinnunga chuan December ni 17, Inrinni khan Aizawl a lo thleng a, a rual hian Zakhuma leh Jacob Vanlaltluanga-te pawh lo hawin an awmna veng Govt.Complex khawtlang leh Mizoram Weightlifting Association-te chuan ropui takin an lo hmuak.

Govt.Complex kawnah heng ritchawichak pathumte hmuahna hun hi inrinni tlai dar 5:00 khan buatsaih a ni a. Mizoram Weightlifting Association President Pu H.Thangchungnunga'n kaihruaiin kum 2020 Tokyo Olympics-ah India tan Mizoten Weightlifting-ah medal lak ngei an tum thu a puang a. Anmahni lawmna thilpek khawtlanga pawl hrang hrang leh Weightlifting Association-ten an pe.

Nov.8-16, 2016 chhung khan Tokyo-ah Asian Youth Weightlifting Championship neih a ni a, 56 kg Weight category-ah Jeremy-an Snatch, Clean & Jerk-ah a vaiin 231 Kg a chawi a, silver medal a dawng a. October 19-25, 2016 chhung khan IWF World Youth Weightlifting Championships Penang, Malaysia-a neihah 235 kg chawiin silver medal a dawng bawk a, October, 25-30, 2016 chhunga Commonwealth Youth Weightlifting Championships Penang,Malaysia-a neihah 235 kg chawi lehin gold medal a dawng leh bawk a ni.

Nov.30- Dec.4, 2016 chhung khan Bhubaneswar, Odisha-ah 12th Sub-Junior Boy & Girls and 53rd Men & 28 women Junior National Weightlifting Championships neih a ni bawk a, hetah hian Jeremy Lalrinnunga chuan 56 kg Boys-ah golkd medal dawngin 231 kg a chawi a, Jacob Vanlaltluanga chuan 50 kg Boys-ah Silver medal dawngin 190 kg a chawi a, 56 kg Boys-ah Zakhuma chuan 227 kg chawiin bronnze medal a dawng ve bawk.