14 Sep 2018 04:52

inkhel

Japan Open-ah India aiawh an tla vek

Japan Open badminton tournament khelh mekah Kidambi Srikanth chuan quarter final a pal tlang zo ta lo a, India aiawha telte chu an tla fel ta vek a ni.

World No. 1 hlui Kidambi Srikanth hi quarter final-ah South Korean Lee Dong Keun nen an inkhel a, $700,000 Badminton World Federation World Tour Super 750 Series tournament-ah hian Srikanth chu 21-19, 16-21, 18-21 in a chak ta lo a ni.

7th seed Kidambi Srikanth hi a chau tawngkhawng ve niin a lang a, game hmasa berah chak mahse a tumpui hi a inpawhthlaktir a, darkar khat leh minute 19 zet an inkhelh hnuah Srikanth hi a chak ta lo a ni.

Gold Coast Commonwealth Games a silver medalist hian Asian Games-a a hneh loh, Wong Wing Ki Vincent, Hong Kong lakah phuba a lo la tawh a, hemi hma chiah round-ah Wong Wing Ki Vincent hi a hneh a ni.

A hmain PV Sindhu chu Chinese player Gao Fangjie lakah a lo tlawm tawh a second round a pel thei ta lo a. Tun season chhungin Sindhu hi a che chhe lem lo viau a, tournament lian awm tawhah chuan silver medal a la zel hlawm a, mahse a khelhpui Fangjie chuan Commonwealth Games, World Championship leh Asian Games silver medalist chu a hlau vak lo a nih hmel a, a chak zawkah a tang ta daih a ni.

Indian shuttler dang HS Prannoy chuan Anthony Sinisuka Ginting, Indonesia chu 14-21, 17-21 in second round-ah a hneh lo a. Sameer Verma chuan first round bak a pel lo a, 18-21, 21-0, 10-21 in HS Prannoy hneh loh Anthony Sinisuka Ginting hi a lo hneh lo tawh bawk a ni.

Men’s doubles pair Manu Attri leh B Sumeeth Reddy te chu pre-quarter final-ah an chak lo bawk a ni.