October ni 19 atanga tan IWF World Youth Weightlifting Championship chu Penang, Malaysia-ah neih mek a ni a, hetah hian Mizo rawlthar Jeremy-a chuan Silver medal pahnih a la a, India hming a ti tha hle a ni.

Govt. Complex rawlthar Jeremy Lalrinnunga hi Army Sport Institution-a awm lai a ni a, 56 KG category-ah a khel a, Snatch, Clean & Jerk-ah 108 KG chawiin hetah hian Silver Medal a la a, Overall-ah 235 KG chawiin Silver Medal a la bawk a ni. Tin, Jeremy-a hian Snatch, Clean & Jerk 127 KG a zo bawk a ni.

inkhel.com chuan Jeremy-a hi kan be pawp nghal a, "Gold la phak lo mah ila ka lawm tak zet a ni. International level-a ka vawi khat chhuahna a ni a. Ka career-a chet that ber tum a la ni. Bul ka tan chauhva, Gold lak ka tum, Pathian zarah ka la la ngei ang.

"Pathianin min awmpui zel avangin a chungah ka lawm a, ka nu leh pa min tuipuitute chungah ka lawm em em a. Tin, Mizorama ka coach lo hrawn tawhte leh Army Sports Institution leh India coach-te chungah ka lawm em em a, min lo tawngtaipuitu zawng zawngte chungah lawmthu ka sawi bawk a ni," tiin Jeremy-a chuan inkhel.com a hrilh a ni.

Pictures credit : IWF