ITF chawimawina sang ber dawng tur Goolagong Cawley

23rd May 2018, 04:05AM

Evonne Goolagong Cawley chu International Tennis Federation chuan chawimawina an pek chhuah sang ber an hlan dawn tih ITF chuan an puang.

Australian tennis star hnenah hian ITF chuan chawimawina sang ber Philippe Chatrier Award an hlan dawn a, June 5 khian French Open khelh laiin Paris khawpuia 2018 ITF world champion dinner neih hunah he chawimawina hi an hlan ang.

He chawimawina hi ITF president hlui Philippe Chatrier hming chawia phuah a ni a, 1996 atang khan an sem tan a, kum tin tennis khawvela mi chungchuang bikte hnenah an hlan thin a. He award lo dawng tawh zingah Bille Jean King, John McEnroe leh Martina Navratilova te pawh an tel.

Goolagong Cawley hian kum 19 mi chauh niin 1971 khan Roland Garros leh Wimbledon ah singles title a la a, khawvelin an hmelhriat tan a. Kum 16 chhung zet tennis a khel a, hemi chhung hian Grand Slam single title 7 ngawt a la hman a, Australian Open-ah phei chuan vawi 4 a champion a, World No. 1 pawh a lo ni tawh a ni.

1991 khan United States atangin Australia lamah a kir leh a, hemi hnu hian Goolagong Cawley hi Tennis Australia te nen an thawkho a tennis khawvelah hmeichhia tam thei ang ber teltir tumin hma an la chho a ni.

ITF chuan thuchhuah siamin, “ITF chuan lawm takin Evonne Goolagong Cawley hnenah mi chungnung bikte hnena chawimawina kan pek thin chu lawm takin kan hlan dawn a. Player ropui tak a ni a, mi tam tak tan entawn tur tha tak a hnutchhiah teuh bawk a, chawimawina dawn hi a phu a ni,” tiin an tarlang.

Copyright © inkhel.com 2024. All rights reserved.