Italian Open title humhimtu Elina Svitolina

21st May 2018, 01:05AM

Italian Open final-ah Elina Svitolina chuan World No.1 Simona Halep a sawp hrep a, a title a humhim.

World No. 4 Svitolina hi a tir atangin a che tha nghal hle a, set khatnaah game hloh miah loin minute 19 chhung lekin a chak hman a. Kum 26-a upa, Romanian star Halep hi a coach Darren Cahill chuan a vin nasa hle nghe nghe a ni.

Nikum final-ah pawh an pahnih bawk hian an inhmachhawn tawh a, Halep hi a tlawm zawkah a lo tang tawh a. Kumin final-ah pawh kum 23-a upa Ukrainian star Elina hi a chungnung daih zawk a, harsa lo takin a chak nawn leh a.

Set hnihna chu a hma ai chuan tlemin a rei deuh a, mahse Foro Italico hmuna Campo Centrale-ah nikum ang bawkin Halep chu inhliam vangin hun eng emaw chen chu a buai leh a, Svitolina chu a chak tlang a, Elina hi 6-0, 6-4 a chakin Rome title hi a la nawn leh ta a. Svitolina leh Halep hi vawi 6 an inhmachhawn tawh a, Elina hi 4-2 in a chungnung ta chiah a ni.

Elina Svitolina hian tun season chhungin WTA title pathum a la tling ta chiah a ni a. Foro Italico-ah hian 2013 leh 2014 khan Serena Williams chu a lo champion zawn tawh a, hemi hnua title humhim thei leh hmasa ber chu Svitolina hi a ni a, lawmman $600,000 vel a la a ni.

Copyright © inkhel.com 2024. All rights reserved.