Chennaiyin FC chuan 3-2 in Bengaluru FC an hneh a, Indian Super League (ISL) 2018 champion an ni.

Final thleng turin Bengaluru hian game 10 chhung chu hneh loh an nei tawh lo a, champion ngei pawh an inring hle a. Inkhel an tan a, bul pawh an tan fuh hle a.

Minute 9 chauh an khel hman tihin Sunil Chhetri chuan goal a thun nghal a, Bengaluru chuan hma an hruai der mai a. A sir atanga Udanta Singh ball vawrh phei chu Chhetri hian a lo tauh lut a, ISL a Sunil Chhetri goal thun hma ber tum a ni.

Minute 17-naah mikhual lamin corner an hlawh a, Gregory Nelson chuan a pet a, heta ball kal hi Mailson Alves chuan a lo tauh lut a, Chennaiyin si phurh a sut a.

Half time thlengin goal dang a awm belh dawn lo emaw tih laiin Mailson bawk a rawn che fuh leh a, a thlengtu team goalkeeper Gurpreet Singh Sandhu man hman loh turin Bengaluru goal-ah a tauh lut leh a, half time a nih chuan Chennaiyin hian 2-1 in hma an hruai a.

Raphael Augusto chuan minute 67-ah goal a thun ve leh a, Sree Kanteerava Stadium chhunga mikhualho an au leh ta dur dur a, Chennaiyin chuan 3-1 in hma an hruai ta.

An innawr leh ngial a, hun tawp dawnah Miku chuan Bengaluru si phurh pakhat sut leh mahse hun tawp thlengin goal a luh belh ta lo a, Chennaiyin FC chu a vawi hnihna atan ISL champion an ni ta a ni.

He tournament bikah hian Chennaiyin hian ATK record an nihrual chiah a ni.