14 Jul 2017 12:16

Inkhel

Mizo Sports Website hmasa ber

​Iron Heart : Ferdinand & Keanu Reeves

Nimin khan Rio Ferdinand-a nu Janice St Fort chu cancer vangin kum 58 mi niin a boral.

A nupui cancer Rebecca thih atanga kum hnihna lekah Manchester United defender hlui Rio Ferdinand chuan a nu a chan leh ta a, a tuar hle nghe nghe a ni.

A nupuiin a boralsan hnuah hun harsa tak a tawng a, heti chung hian rilru huaisen tak nen a fate a enkawl, nu leh pa nih a kawp a, a rilru hahnate tih zangkhai nan Rio hian gym-a hun a hman tam thu a sawi nghe nghe.

Nupui dang neih zai rel lovin pachang takin Rio hian chhungkua a enkawl a, hemi kawngah hian a nu Janice St Fort chuan nasa takin a pui bawk.

Mi rilru huaisen a nih avangin a hun harsa tawhte chu mite tana malsawmna a ni ta a, harsatna tam tak tawk ve mekte tan tanpuitu ropui ta a ni.

Tuna a nuin a boralsan avang hian tuar hle mahse he a harsatna hi a tawrhchhuah leh ngei a rinawm hle, a inkhelh lai atang tawha mi huaisen a nih avangin lungngaihna leh thihnain a hneh lo tia sawi thin kha a ni a, mite tan malsawmna a rawn nih leh ngei a rinawm.

Bill & Ted's Excellent Adventure (1989) film ka en atanga ka ngainat em em Keanu Reeves chanchin hi zep zauh teh ang. Hollywood actor zinga ka duh ber pakhat a ni a, Film hlawhtling tak tak a chang teuh, chung zingah chuan Matix (1999) leh Speed (1994) te chu vawiin thlenga film ennawn ngun a la ni.

Kum 3 mi lek a nih laiin a pain a chhuahsan a, a thiam theih loh vang leh retheihna leh a nungchang dik loh avangin school pakhatah pawh a lut rei thei lo, high school a kal laiin school paliah ngawt a lut kual. Midang aiin a lehkha zir kawng a bumboh bik hle.

Kum 23 mi a nihin a thian tha ber chu drug overdose vangin a vuiliam. Kum 1998 khan a hmangaih Jennifer Syme nen an intawng, a kum lehah fanu an pai a, mahse damin a piang lo hlauh.

An tuar dun hle a, hei vang hian an relationship pawhin a tuar hle. An fanu thih atanga thla 18-naah Jennifer chu car accident vangin a boral leh a, hemi hnu atang phei hi chuan ngaihzawng emaw nupui emaw fa emaw neih a duh tawh lo bur.

A farnu chu thisen cancer vangin hun rei tak chhung buaipui a ni a, a nunah thil tam tak a tawn avangin khawvel hi a thlir thiam ta.

The Matrix a channa atanga a hlawh zawng zawng atanga 70% lai chu thisen cancer enkawlnan hospital-ah a pe tawp. Hollywood star zawng zawng deuhthawin in ropui tak tak neiin; changkanna an um laiin ani erawh mi pangngai tak nunin a nung a.

Bodyguards pawh a nei lo, thuamhnaw to leh ropui tak tak a inbel ngai lo bawk a, a hausakna chu $350 millions vel nia chhut ni mahse in luahin a khawsa ve mai mai a, car mawi tak takin a veivak ve lo, mi nawlpui veivahna public transport a hmang ve mai thin.

Van atanga angel rawn tla ang maiin amah belbulte chuan an ngai, harsatna chi hrang hrang a tawh hi mihring ngaihah chuan a nasa em em, heti chung hian rilru huaisen tak a nei a, hei hian harsatna tawk mek midangteah entawntlak nun huaisen a zirtir ta zawk a ni.