Invitational Basketball Tournament a hmuhnawm chho hle

22nd April 2018, 04:04PM

Kulikawn vs Armed Veng
1st & 2nd quarter ah an inhnehtawk hle a, Armed Veng in halftime ah 31-30 in hma an hruai. 3rd quarter tan phat atangin Kulikawn in game an thlak hlawk a, an transition rang tak Armed Vengin an dang hlei thei lo a, ball movement a that bakah Armed Veng lamin ho te te an thun thelh zel si a, he quarter bikah hian Kulikawn hian point 28 an score laiin Armed Vengin point 9 chiah an score ve a ni.

4th quarter-ah Armed Veng tang viau mahse 2nd half an tan that loh an tuar a, Kulikawn in 70-61 in hnehna an chang ta a ni.

Tuikhuahtlang vs Bethlehem
Tuikhuahtlang an khel tha nghal hle a, an shooter te kut a kal hle a, inside-ah pawh Bethlehem lam aiin an che tha a, game an thunun nghal hle a ni. Tuikhuahtlang hian 35-15 in 2nd quarter khelh laiin an hma an hruai hman a, chawlhlawk hma hretin ruah a sur nasat avangin game tihtawp lailawk a ni.

Game khelh chhunzawm leh anih hnuin court nal deuh avangin player te duh angin an tal ngam ta lo deuh a, Half time-ah 37-16 in Tuikhuahtlang lamin hma an hruai. 3rd quarter-ah pawh Tuikhuahtlang lamin hma an hruai chhunzawm zel a, Bethlehem lamin khel tha deuh mahse an inkar an ti zim hleithei bik lo.

4th quarter-ah erawh Bethlehem an rawn khel tha hle a, an inkar a zim telh telh a, Tuikhuahtlang lamin basket an nei hleithei lo a, point 15 chiah Tuikhuahtlang in an score theih laiin Bethlehem lamin point 30 an nei a, mahse hunin a daih tak loh avangin uiawm takin 64-67 in Bethlehem an chak zo ta lo.

Dawrpui Vengthar vs Kanan
Round of 16 hmasa bera a thlengtu team leh veng thenawm inkhel hi a tir atangin an inngam tawk hle a, 1st quarter-ah Dawrpui Vengthar che tha hretin 2nd quarter leh 3rd quarter-ah Kanan an chungnung thung.

Kanan player chhuanvawr K. Vanlalruata chu foul a ngah avangin coach in a thuttir rih a, Kanan in an tuar hle a, point 2 chauhin 3rd quarter tawpah hma an hruai hram a. 4th quarter tan tirhah Dawrpui Vengthar lam an rawn khel tha hle a, Kanan an chet buai lai takin K-a a rawn lut leh a, ani hian hma a rawn hruai let pui leh thei hial a, mahse player pawimawh dang Fakmawia a foul out bawk si avangin Kanan defence in a tuar hle a, player nei tha zawk team leh 4th quarter khel tha zawk Dawrpui Vengthar chu 80-75 in an chak ta a ni.

Khatla South vs Tuikual North
Khatla South lamin bul an tan chhe hle a, 1st quarter-ah point 5 chiah neiin Tuikual North lamin point 22 an score thung a, Tuikual North lam an chungnung hle a ni.

Ruah vangin match a khaihlak a, hun engemaw chen chu an chawlh phah a. Game chhunzawm a nih hnuah Khatla South an rawn tang thar hle a; amaherawhchu, Tuikual North team ten an lo dang chat thei ta hram a, a tawpah Tuikual North hi 56 - 48 in an chak ta a ni.

Copyright © inkhel.com 2024. All rights reserved.