​Inter Branch YMA Football Tournament Round of 16 lut a hriat kim ta

01st June 2017, 11:06PM

June ni 1, Ningani khan Central YMA leh Mizoram Football Association (MFA) tangkawpin an buatsaih TT Royte Trophy Inter Branch YMA Football Tournament Round of 32 khelh hmabak la awm chu khelh zawh a ni a, inkhel vawi hnih awmin Hualngohmun leh Chhinga Veng chuan an khingpui ve ve hnehin Round of 16 an lut ve ta a ni.

June ni 2, Zirtawp tlai dar 4:00 PM-ah Central YMA Hall-ah Round of 16 Draw neih tur a ni a, Round of 16 lut Branch YMA  aiawh pakhat leh Manager, Coach leh Team Captain tel theuh tur a ni.

Round of 16 lut  te: 1. ITI 2. Leitan 3. Chaltlang 4. Aizawl Venglai 5. Zawlnuamborai 6. Lengpui, 7. Ramhlun South 8. Republic Vengthlang 9. Chanmari 10. Republic Veng 11. Salem 12. Bawngkawn 13. Durtlang 14. College Veng 15. Hualngohmun 16. Chhinga Veng

09:30 PM-ah Hualngohmun 2-2 Khatla

(Robert Lalliankima 6', 90+1' (p)  (Michael Lalremruata 42', Johny VL Muanpuia 77')

(Penalty Shootout-ah Hualngohmun 5-4 in an chak)

Inkhel hmasa zawk Hualngohmun leh Khatla te hun pangngaiah 2-2 a anin hneh tawk hnuah Penalty shootout-in chak zawk zawn a ni a, Hualngohmun chuan 5-4 in hnehna an chang.

Ruahsur nasat vang leh chhumzing vangin inkhel vawi hnih chawlh lailawk a ni a, V Lalruatsanga khatla player chu hnawh chhuah a ni bawk. Inkhel tan a tang a minute 6-ah Hualngohmun tan Robert Lalliankima chuan goal hmahruai a khung chu Khatla tan hun tawp dawn minute 3 ala awmin Michael Lalremruata chuan an siphurh a rul thung.

Second half-ah Khatla tan Johny VL Muanpuia chuan  minute 77-ah an goal hnihna khung mahse, huntawp dawn injury time-ah Hualngohmun tan Robert Lalliankima bawk chuan penalty an hlawh a tangin an siphurh a sut leh a, hun pangngaiah 2-2 in anin hneh tawk ta a ni. Penalty shootout-in chak zawk zawn a ni a, Hualngohmun chuan 5-4 a hnehna changin Round of 16 an lut ta a ni.

11:30 PM-ah Ramhlun Vengthar 1-4 Chhinga Veng

(Zodinmawia 15') (Lalsawmzela 10', 43', Lalkhawpuimawia 85', Lalthlamuana 90+1')

Inkhel hnuhnungah Chhinga Veng chuan 4-1 a Ramhlun Vengthar hnehin Round of 16 an lut ve bawk. Inkhel tan a tang a minute 10-ah Chhinga Veng tan Lalsawmzela chuan goal hmahruai khung mahse minute 5 aral leh hmain Ramhlun Vengthar tan Zodinmawia chuan an siphurh a sut ve nghal zat bawk. Chhumzing vangin inkhel vawi khat chawlh lailawk a nih hnuah huntawp nan minute 2 ala awmin Lalsawmzela bawk chuan Chhinga Veng tan an goal hnihna a khung leh a, Chinga Veng chuan 2-1 a hmahruaiin chawlh lawk an hmang.

Second hlaf-ah Ramhlun Vengthar chuan an siphurh sut tumin nawr mahse goal an thun mai thei lo. Chhinga Veng chuan an hun tha neih hmang tangkaiin huntawp nan minute 5 ala awmin Lalkhawpuimawia chuan an goal thumna a khung a, injury time-ah Lalthlamuana chuan an chak nem nghehna  goal khung leh in Chhinga Veng chuan 4-1 in hnehna an chang ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.