India hi football-a kan hnufum zia kan hria a, theihtawpin football hi chawi nun tum ni thin mahse ala hlawhtling thei tak tak lo.
India-in football-a hma a sawn theihna tura hmachhawp ropui tak an neih chu All Indian Football Federation (AIFF) leh a thawhpui IMG Reliance chuan Thawhlehni khan I-League, Indian Super League (ISL), I-League Second Division club-te bakah Football Sports Development Limited (FSD) leh Star Sports aiawhte kokhawmin an puang zar a, an hmachhawp hi lehkha puan maiah chuan awlsam takin sawifel zung zung theih mahse a tak aram chantir erawh a khirh viau dawn niin a lang.
ISL KAN HLAWKPUI LO?
India ram football-a thuneitu sangber AIFF hian I-League awmsa reng siin kum atang khan Indian Super League (ISL) an siam thar a, hei hian I-league lamah a tha zawngin nghawng a neih beisei mahse an beisei loh lamah thil a kal thui mah zawk.
ISL hian a season hmasa ber atangin entu mipui tam tak a hip nghal ruih ruih a, sum pawh a tam a hlawhtlin pawh a hlawhtling nghal viau mai. Mahse he intihsiakna hian I-League-ah nghawng a nei ta em? A nei tam lo khawp mai. I-League hian entu a ngah phah lutuk lem lo va, India-in football a ngainat nasat phah lem lo bawk.
ISL-ah mi hausa tam takin sum an sen hrehloh laiin I-League tan erawh mi hausa an 'easy' ve lem lo va, club mai nilo player thlengin hei hian a chhe zawngin nghawng a nei.
I-League hian club-te hnenah sum sih chhuah tur a nei tlem a, club tam takin khelhzui duh mahse sum hautak vangin an chhuahsan a player club nei mumal lo an awm phah bawk.
Mahindra United, Bharat FC leh Pune FC-te pawhin I-League hian an sum hnar a tihpun sak tam loh avangin an khelzui ngam tawh lo va, 2014-2015 season I-League-a pahnihna nih pha ngat Royal Wahingdoh FC pawhin 2015-2016 I-League chu sum tlakchham vangin an khelzui thei tawh lo bawk. A hma chiah season-ah PAHNIHNA an ni!
ISL hian nghawng tha a neih leh neihloh chu a hriat vek tawh e, I-League hian he sum tam ve chiamna tournament hi a chhawr teh chiam lo.
'Lets Football' tih thupui hmanga football chawi nun tumna tournament (ISL) hian player tha an hip lut tam lem lo. Player 'tha thin' te chiah ani an hip luh. An player tha thin lakluhte lah hmuhnawm khawpin an khel ngailo.
Kum 2015 October ni 8-a India-in 2018 World Cup qualifying round an khelh dawn khan ISL club thenkhatte'n an player-te India team zawm turin an chhuahtir thuai phal lo va, inpuahchahna tha pawh nei mumal lovin India hian Turmekistan an hmachhawn a 2-1 an chak lo. ISL hian hnawkna chen chu a nei ngei e.
AIFF HI DEM TUR AN NI?
Ni e ram khat football-a thuneitu sangber ni ve meuh si hi an dem loh theihloh tlat. An thawhpui IMG Reliance kutah hian an in nghat lutuk ni ber hian a lang.
AIFF hian thil thui tak dawn lovin thutlukna an siam mai mai emawni chu aw tih theih turin sulhnu an lo nei fo tawh a, season liamta mai pawh khan hei hi a takin a langchhuak.
An player-te hah lutuk vangin Bengaluru FC chuan India tan khel tura koh an player-te chhuah an phal lo va, Mohun Bagan pawhin AFC Champions League qualifying round khelh tur an neih avangin buaina an nei a, I-League khelh tur an nei bawk si nen AIFF dem rawn an ni.
Tunah hmachhawp lian tak nen India ram football tih hmasawn an tum leh chu a ni a, an tum hi chu a tha thlawt mahse a hlawhtling meuh angem tih hi zawhna langsar ber a ni.
AN HMACHHAWP HI A THA TAK TAK EM?
Thil engkim hian thatna lei leh thatlohna lai a nei vek a, tuna AIFF leh IMG hmachhawp pawh hian thatna lai leh thatlohna tam tak a pai nghal teuh. Thenkhat han tarlang ila.
A thatna lam han sawi hmasa ta ila....
* Football khel an pung ang: An hmachhawpin a tum chu kan hre tawh a, san dan indawt neiin League pathum a awm dawn a he'ng league pathumte hian player an mamawh vek bawk.
Ngaihruatnaah chuan league pathuma club awm tur (a zat ala hriatloh)-te hian a tlem berah player 600 chuang chu an chhawr ngei dawn a, club 30 vel chu an ni dawng chiang. Hetiang hi anih chuan player tam takin club an nei dawn a, Mizote tan pawh thu lawmawm tak a ni.
* Player tha a hip dawn: ISL-a sum tam zia kan hria a, player-te hlawh hnemzia pawh kan hre bawk. Tuna hmachhawp awm tharah hian league sangberin player tha zawkte an hip lehzual a beiseiawm a, a chhan chu an khelh hun chhung a rei deuh tawh dawn vang a ni.
Mahse tih ala ngai ta fo, rampawn payer hip lut tam mahse rampawn player-te game khata chhawr theihzat bituk hi ennawn a tul ang.
* Calendar thar hman ani dawn: ISL hi October atanga December thla thleng khelh thin a ni a, I-League erawh January thla atanga April thla thleng ani thung. I-League hnuah hian May thlaah Federation Cup khelh leh ani bawk.
Hmachhawp tharah hi chuan engkim a danglam dawn a, league pathumte khelh hun chhung a inang vek tawh ang. Kum 2017 hian India-in Under- 17 World Cup a thlen dawn vangin 2017/18 seaon chu November leh March thla chhunga khelh tur a ni a, 2018/19 season atang chuan September leh March thla chhungin khelh tawh tur ani ang.
* TV-ah kan en kim thei dawn: Tun dinhmuna I-League (League 1 ni tawh tur) buaina ber pakhat chu entu an tlem thei lutuk hi a ni a, entu an tlem chu sawiloh Live-a pechhuak duh an tam lo. Hei hi a chhan chu a hlawk loh em vang a ni.
ISL hi chu Star lamin an pechhuak sa a, League 1 pawh Star hian an pechhuak ve tawh ang a AIFF digital platform-ah pawh hmuh theih ani ang.
League 2 erawh AIFF kalpui thovin 'online streaming' hman a ni dawn a, regional channel hrang hrangin an pechhuak thei bawk ang.
* Sum an sem zai tawh ang: Tuna Indian football buaina neih lian tak pakhat chu sum chungchang hi a ni. Kalphung tharah chuan ISL atang sum lakluhte pawh sem zai a ni dawn a, League 1 club-te'n AIFF atangin sum tha hnem tak an hmu thei dawn a, League 2 lam pawhin League 1 lam aia tam zawk AIFF atang hian sum an hmu ang.
* AIFF Club licensing criteria zawm that a ni dawn: ISL club-te'n Asian Football Confederation (AFC) dan behchhana siam AIFF Club licensing criteria an zawm a tul dawn a, an in her rem ve hret a ngai ang.
ISL club-te hi rampawn player paruk neih phalsak zui zel chu an ni dawn a, mahse AFC Champions League emaw AFC Cup khel tur chuan rampawn player pathum bak squad-ah an dah thei dawn loh a, Asian player pakhat tel ngei ngei a ngai bawk.
AFC hian an hnuaia intihsiakna khel theizat hi Member Association ranking procedure hmangin an teh a, national team chet thatdanin 30% a keng an hnuaia intihsiakna (Asian Champions League leh AFC Cup) season hnuhnung palia club sulhnuin 70% a keng ve bawk.
Tun dinhmunah India hian AFC hnuaiah hian spot hnih chiah a chang a, I-League leh Federation Cup-a champion-in AFC hnuaia intihsiakna hi an khel thei.
Member Association ranking procedure hman anih vang hian AIFF leh IMG reliance chuan tun atanga kum hnih emaw kum thum liam hnuah chuan AFC hnuaia intihsiaknaah hian team pali an tel tir theih an beisei.
AN HMACHHAWP THATLOHNA LAM
* Lungawilo an tam ang: Hei hi chu a chiangsa tih theih a ni. ISL-a khel sa team pariat (8) chu he league sangber khel tur hian tlingsa an ni a, pariat chiah hian an khel dawn lo tih an tarlang tel bawk a eng team-in nge zawm ang tih hi zawhna awm mek a ni.
I-League-a awm mek club tam takte hian league sangber khelh tum mahse an tlin dawn lo va, league hniam zawk a khelh hi an tlawmngai viauiin a rinawm.
* Kolkata an buai zual maithei: League sangbera tel pha tur hian tun I-League team zinga pathum - Mohun Bagan, East Bengal leh Bengaluru FC-te chiah hi beisei ngam an ni a, mahse engtin nge ni ta ang?
Bengaluru FC hi sawi ta lawk ila. I-League season liamtaa champion hi ISL club awmsa pakhat nen thlunzawm (merge) tur nite in sawi thawm a awm a, mahse he club hian an duh kherin a rinawm loh.
He an hmachhawp hian club awmsa te nuai bo a tum ni te pawhin a lang thei lek lek. East Bengal leh Mohun Bagan pawh thlunzawm mai tur anga sawi a awm ve a, an thlunzawm lo anih chuan club engemaw zawk zawk hi Atletico de Kolkata nen thlunzawm mai turin an ruahhman tih sawi a awm veleh zel bawk.
Hei hi a chhan chu East Bengal leh Mohun Bagan hian a hranpain khel ve ta se Atletico hian tantu (fans) an nei mang dawn lo. East Bengal leh Mohun Bagan derby tluka hmuhnawm India hian a nei leh kher angem?
* Club lian an vul zel ang: ISL khel tur hian in petkai theih pawh ni dawn mahse kai thar team dan dam chhuah (survive) a har nghal viau dawnin a lang. ISL hian player tha zawng zawng an hui vek dawn a, league hniam lam tan club lian tawh sa khin thlak chu har tak tur a ni ang.
'Football-ah hian theihloh a awm loh' ti fo mah ila club lian nge nge chu an dingchang tam zawk tih chu hmua hre tute kan ni.
* Club thenkhatin dinhmun an hloh dawn: ISL-a tel tur hi team hi 12 an ni tih sawi a awm a, team awmsa pariatte hi team pali velin an la belh a rinawm.
Hetiang hi anih chuan I-League club zing ami Mohun Bagan , East Bengal leh Bengaluru FC-te hi sawi tawh angin tel awm ber an ni a, club thenkhat tan a lawmawm hauh lo ang.
Goa lamin I-league-ah hian Salgaocar FC leh Sporting Clube de Goa an lo thawhchhuahpui a, Sporting Clube de Goa president Peter Vaz chuan I-League club-te sulhnu thui tak kha theihnghilh mai bik chi a nilo tih a sawi a, kalphung thar turah hian a lungawi zan lo.
Vaz hian hemi chungchang hi Salgaocar neitupa Shivanand Salgaocar ala sawipui dawn niin Times Of India chuan an tarlang.
Tuna I-League club tam zawk hian an player thate an hum zo dawn lo chiang a, player tha an neihloh miau chuan club lian zawkte elpui a harsa ang.
THUBELH
Mi tam zawk chuan tuna hmachhawp an tarchhuahte hi a hmaa an sawi lar ISL leh I-League sawikhawm (merge) emaw kan ti maithei a, mahse a nihna takah chuan 'in thuam thatna' lam zawk a ni.
ISL hi FIFA pawmpui ni tura an duh vangin hetianga ruahhmanna siam hi an nite pawhin a ngaih theih. Hun engemaw ti chhung chu league sangbera kaisan a theih dawn loh avangin club tam tak tan League 1 emaw League 2 lamah lo par vul viau kha a ho tlat thei dawn a, buaina hi ala in tan dawn chauh niin a lang.
'Ruahhmanna tha a pawimawh a, umzui loh erawh chuan mualphona a ni.'