June thla khian Hero Intercontinental Cup khelh a ni dawn a, hetah hian India national team te chu South Africa, New Zealand leh Chinese Taipei te nen an inkhel ang.

Mumbai Football Arena-ah June 1-10 chhungin he tournament hi an khel dawn a, Star Sports chuan live telecast an tichhuak thin dawn a. Hero Intercontinental Cup hi kum tina khelh tura ruahman niin, kuminah hian a thlengtu India bakah CAF aiawh South Africa, Oceania aiawh New Zealand leh AFC aiawh Chinese Taipei te hi an inel dawn a ni.

Hero Intercontinental Cup 2018 khel tur zingah South Africa hian FIFA World Cup an khel ngun tawh ber a, vawi 3 ngawt an lo tel tawh a, New Zealand hi vawi 2 an tel tawh bawk a. An pahnih hian an tel hnuhnung ber chu 2010 World Cup, South Africa kha a ni.

All India Football Federation chuan ram dang pathumte hi inremna ziahpuiin, player naupang deuh tir loin first team pangngai an tir hlawm dawn a. Team pali te hi an inkhel kual vek ang a, point hmu sang pahnih te chuan Grand Finale an khel dawn a ni.

He tournament hi India in UAE a AFC Asian Cup 2019 a khelh tur atana inbuatsaih lawkna a ni pakhat a. Kum 8 chhunga Continental Championship khel thei tura an tlin vawi hnihna niin, a pumpuiah vawi 4 an tling tawh a, a hnuhnung ber chu Doha 2011 ah a ni.

India football team hian tun hnaiah hma an sawn chho ve hle mai a, April 2018 FIFA Ranking ah khan Top 100 huang chhungah awmin, 97-na an ni phak a, June 2016 leh November 2017 inkar khan official match 12 khelin chak loh an nei miah lo a ni.

September 2017 khan Hero Tri-nation series an khel a, India hi an champion nghe nghe a ni.