Kum 34-a upa Zlatan Ibrahimovic chuan Manchester United a zawm dawn niin a lang ta.

Daily Mirror-in an tarlan danah chuan PSG-a contract hman zo hlim Ibrahimovic hian Manchester United-ah kum 1 daih contract a ziak dawn niin an sawi a, a contract hi kum dang leh atan pawh pawhsei theih tura duan a ni bawk niin an sawi.

Ibrahimovic-a hian tun atanga hun reilote ah Manchester United hi karkhat a £250,000 hlawh turin a pan dawn niin an sawi a, United hian striker thar mai bakah manager thar Jose Mourinho pawh an lalut thuai dawn niin a lang ta bawk a ni.

Jose Mourinho hian United a enkawl a nih chuan Chelsea-a a hman duh tawhloh hnu Man Utd player pawimawh Juan Mata hi a hralh chhuah leh ngei a rinawm hle a, a ni bakah hian Bastian Schweinsteiger chu dinhmun hlauhawmah a ding ni a ngaih a ni bawk.

Jose Mourinho hi Zlatan Ibrahimovic-a te hian United an zawm a nih chuan an vawikhat intawnna tur a ni dawn lova, Inter Milan ah khan an ni phanih hi an lo in hrawn thin tawh a ni.