12 Jun 2017 02:32

Inkhel

Mizo Sports Website hmasa ber

​I League leh ISL engtin nge a kal dawn?

India rama football inelna sang ber chu I League a ni a, ngaihhlut hlawh ber leh sum tamna ber erawh Indian Super League a ni. I League leh ISL suih fin tumna awm chuan dodal a hlawh a, I League leh ISL hmalam hun a chiang lo. All India Football Federation president Praful Patel chuan June 10 khan I League club aiawhte a ko a, an hmalam hun a lang ta ruak mai.

Rawtna an siam danah chuan I League leh ISL hi a rualin November atanga khelh tan a ni ang. I League-a palina chin leh ISL-a palina chin hian season tawpah playoff an khel ang - hei hi hming phuah a la ni lo. 'Indian Super Cup' tih hi an sawi rik dan a ni a, 'Indian Champions League' tiin media lamah report a ni bawk.

Season tawpa ISL leh I League-a a sang pali ve ve inkhelh hnua a champion hian AFC Champions League-ah India ai a awh ang a, pahnihna hi AFC Cup-ah an inlan bawk ang. He ruahmanna hi tun season lo awm tur atan chiaha tih a ni a, a kal zel dan chu study group dinin an la zir chiang ang.

A tobul chu

AIFF hian India rama football kalpuina turin pawisa a nei lo. Hei vang hian kum 2010 khan International Management Group-Reliance (IMG-R) nen kum 15 atana thawhhona thuthlung an ziak. IMG-R hian AIFF hi vaibelchhe 700 a pe ang a, Indian football-a commercial rights a nei vek ta thung.

IMG-R leh AIFF inrem danah chuan, IMG-R hian sponsorship, advertising, broadcasting, merchandising, video, franchising bakah football league thar siam theihna an nei.

He inremna avang hian IMG-R duh dan angin AIFF a kal a tul ta a, IMG-R hian an sum pek atang hian pawisa hmuh lêt dan tur an zawng ve ta a ni. Ngun takin an ngaihtuah a, India rama football hmanga sum lakluh dan tha ber nia an hriat chu ISL din hi a ni ta a, kum 2014 khan ISL an khel ta a ni.

ISL versus I League

Kum 2014-a ISL a pian chiah khan, Indian football a buai ta. I League-in ngaihven a hlawh lo sawt a, IMG-R lamin I League chawi kan an tum lo a, ISL chiah an vulh a, ISL-in I League chu a hliah ta vek mai.

Indian club-in AFC competition an khelh theihna chu I League kal tlangin a la ni reng a, FIFA leh AFC pawmpui inelna chu I League zawk ni a la ni reng a; nimahsela I League-ah pawisa a tlem bakah player quality a sang lo zawk a, an thlalak dan leh TV-a pek chhuahna lam a inthlauin kawng engkimah ISL a chungnung si a, mipuiin ISL lam an hawi a, I League an hnuchhawn a ni ta ber.

I League - official?

AIFF chuan I League club-te chu official league zawk an nih thu a khat tawkin hrilh reng mah se, I League-in ISL a phak mawlh si lo. ISL-a pawisa a tam zawk avang leh, football kalphungah league pahnih kaltir chu a remchan reng theih loh avangin suih zawm tumna a awm ta.

ISL lam hian Asian competition-a khelh ve an duh a, tuna an kalphung anga 'tournament' leh 'un official league' anga kal reng an duh tawh bik lo. IMG-R lamin AIFF hnenah league pahnih suih zawm dan ngaihtuah turin a nawr ve tan ta.

I League hian AFC competition khelh theihna a la neih chhung chu ISL hi 'official league' a ni thei dawn lo a, ISL neitute hian kum khata cheng vaibelchhe 20 vel seng reng chunga AFC competition khelh theih loh hi an duh tawh lo a, AFC competition khelh theih dan zawn sak turin AIFF chu an dawr ta.

ISL luh a harsa

ISL-a lut tur hian vaibelchhe 15 vel fee pek phawt a ngai a, khelhna tur stadium changtlung tak neih a ngai a, khawpui pakhatah team (franchise) pakhat chiah a awm theih bawk a, dan leh hrai khirh tak tak sum tam tak senna an zam duah bawk si, a buaithlak hle.

I League club zingah Bengaluru FC hi chuan awlsam takin ISL hi an khel thei mai a, an hausak bakah an khawpuiah ISL team an awm lo. Kolkata club lian pahnih Mohun Bagan leh East Bengal hian ISL-a khelh hi an duh a; nimahsela Atletico de Kolkata a lo awm tawh si a, 'one city one club' tih nen a inmil thei ta lo.

Hei bakah hian anni pahnih hian ISL khelhna fee cheng vaibelchhe 15 hi an pek loh tur thu an sawi chiang a, he fee paihsak chunga Kolkata-a ISL khelh phalsak turin ISL lam an ngen ve thung.

Heng club pathum - BFC, EB, MB - ni lo I League club dangte hi chu ISL-a lut tura sawi rik an ni ve lo - sumin a daih lo a, an hmunhmain a tlin lo a, ISL lamin an bengkhawn lo bawk.

A rem lul lo

IMG-R lam chuan Bagan leh East Bengal-te duh anga ISL fee cheng vaibelchhe 15 thai bo an remti lo a, hei bakah hian Kolkata atanga ISL team pathum awn chu tha an ti thei lo.

Bagan leh East Bengal lam thinrimin an Chief Minister Mamata Banerjee an pun a, "Bagan leh East Bengal tel loin Kolkata-ah ISL khelh a ni lo ang," a ti ta rup mai a, Atletico Kolkata-in an hman thin Salt Lake Stadium chu sorkar ta a nih angin ISL atan a hmantir loh tur thu a sawi ve ta.

Boruak a lian chho zel. IMG-R lamin khawpui hrang hrang atanga ISL team thar dil duhte tan tender an chhuah a, Bengaluru, Bagan leh East Bengal-te hian tender hi an la vek a, BFC hian an thehlut a, East Bengal leh Bagan erawhin an thehlut ta lo.

Buaina thelh an tum

AIFF a buai a, IMG-R pawh an buai tho - I League leh ISL hmalam hun a chiang thei lo. Vawi tam an indawr hnuah ngaihdan a inhmu thei si lo a, AIFF president leh AFC senior vice president ni kawp Praful chuan AFC lam a pun ta.

May thlaa Bahrain-a FIFA Congress neih laiin AIFF mi pawimawh, IMG-R hotu lute leh AFC General Secretary Dato Windsor-te an inkawm a, anni hian I League leh ISL club hotute chu AFC hmunpui Kuala Lumpur-a koh khawm an rel a, hei hi Praful-a rawtna a ni.

June 7-ah ISL leh I League aiawhte leh AFC hotute chu an inkawm ta a, AFC lam hian rawtna pali duhthlan tur an lo nei sa a, hei bakah hian tun season-a an kal dan tur duang fel thuai tur leh nakin zela kal dan tur pawh ngaihtuah turin thurawn an pe ta a ni.

Chinfel tumnaah buaina!

June 8 chhunah Mumbai-ah AIFF Executive Committee an thu khawm a, hetah hian I League leh ISL kal zel dan tur chu agenda pawimawh a ni. He meeting hian rei ngial ngaihtuah mah se, he thuah hian thutlukna mumal tak a nei thei lo.

Meeting zawhah AIFF president hoin, general secretary, vice president (North East) a hranpaa inkhung hrangin League Committee chairman leh deputy chairman-te nen an sawiho leh a, "June 7-a Kuala Lumpur-a ISL leh I League hotute koh khawm zet a, a tuk lawka anni rawn loa thutlukna siam leh mai chu a dik lo a, president-in I League club aiawhte kawm leh rawh se," tiin rawtna an siam ta a ni.

A hmawr bawkna chu

June 10 khan AIFF President hian Delhi-ah Bagan, East Bengal, Shillong Lajong leh Churchill Brothers hotute a kawm a, an ngaihdan an sawi hnuah rawtna an siam ta. He rawtna hi IMG-R in an pawm theih chuan kal tlangpui a ni ang:

1. I League leh ISL hi tun season-ah (2017-18) chuan November-ah tanin May-ah a tawp ang a, a ruala khelh tur a ni. Player inkal pawh theih a ni lo.

2. League pahnih inkhelh kuala a sang pali ve vein playoff an khel ang. Playoff-a pakhatnain AFC Champions League khelin pahnihna AFC Cup-ah an inlan ang.

3. ISL ang bawkin I League hi Star TV-ah tihchhuah ve tur a ni (Hei hi chu AIFF Executive Committee-a rawt tawh a ni)

A nghawng tur

He rawtna hi kal tlangpui a nih chuan, player thain pawisa tamna zawk ISL an pan fur ang. League pahnih a kal rual a, a tawpa a hmawr bawkna a inan bawk chuan, I League chu 'second division' ang deuh a nihna chin a awm dawn a, a chhan chu player a inthlauh bakah a hmunhma a inang thei dawn lo.

I League lamin AFC competition khelh theihna a pumbilh thin chu chhuhsak a ni tawh ang a, ISL-in rei tak atanga an duh tawh AFC competition khelh theihna remchang an hmu ang.

Hetihlai hian I League club tan ISL fee (vaibelchhe 15) pek ngai miah loa ISL team hmachhawn theihna remchang a inhawng dawn a, a tawpa playoff hi 'home and away' a khelh tura rawt a ni a, I League-a palina nih phak hi a hlu sawt dawn tihna a ni.

Indian player-te hi chu an inthlau tak tak lo a, I League lamin foreigner an neih that chuan, ISL team hnehin sum tam tak pet chhuahna remchang an nei ang a, ISL-a lut ve si loin ISL nen level khatah an khel thei dawn tihna a ni.

He thutlukna hi Kolkata club lian pahnih chuan 100%-in an la pawm thei chiah lo a, darkar 48 inngaihtuahna hun pe turin AIFF president hi an la ngen ta talh a ni!

Source : Vanglaini