June ni 7, 2017 zan khan R. Dengthuama Indoor Stadium-ah GIG Motors Pro Volleyball League khelh chhunzawm a ni a, Hunthar Veng chuan 5-15, 25-22, 19-25, 25-13 in Ramhlun Sporting Club an hneh.
Hunthar hi vawi thum an chak zawnna niin GIG Motors Pro Volleyball League semifinal an lut ta a ni. League vawi li khel kim hmasa ber niin an chet that ber a ni nghal. Hunthar tan Lalbiakmuana'n point 18 hmuin vawi thum a tisual a, PVL 2 kal meka Mizo mipa zinga LG D3 Player of the Night trophy dawng hmasa ber a ni.
Na tak leh tha taka ball vuak hmanga inelna sang takah Huntharin hnehna an chan theih nan Mizo player an neihte an tangkai. Veikhawr Biakmuana bakah Samson VL Chhanchhuaha, Lalrinhlua leh setter Remsangzuala te hmun pawimawh an luah.
Awlsam taka set khatna an lak hnuah nawr zui zelin set hnihnaah team pahnih an inep tawk hle. Hunthar rinrawl pathum Biakmuana, Sarang S Lal leh Santhosh Kodakkal an che tha tlang a, Ramhlun North team-in 22 bak an thleng zo lo.
Set thumnaah thil awm dan a inthlak a, Suresh Chandra Khoiwal Vicky chuan RSC tanpuiin point 12 a thawk chhuak. Hunthar bet ve thungin point 20 an hmuh tlin hmain lehlam an tlang.
Mahse, RSC chet that chhung a rei lo va, set thum aia tam an khelh hmasak berah thahrui an nei tawk lo. Rinrawl Vicky leh Hafeel VP an chau tih a lang a, mar takin an khel zui thei lo. Mizo player-ten an awi nung zo lo va, set linaah Hunthar kir lehin nuam ti takin an khel a, phu takin an chak.
A hmain TNT leh 3rd MAP lakah 3-2 ve vein Hunthar an chak zawn a, a vawi khat nan point thum thawk chhuakin point sarih an khawl a, league-a pahnihna ni chungin semifinal an khel ang.
Hunthar tan Santhosh chuan point 19 hmu mah se point riat a hloh va, Sarang chuan 17 hlawhin point thum a paih a, Biakmuana nen an pathumin an intluk tlang. Samson-an vawi kua vaw tlain tum thum a tisual a, langsar fal awm lovin team pumpui thawhhona rah an seng.
Hunthar an chak rualin Chhinga Vengin league-a sang ber dinhmun an luah nghet ve nghal a, an khelh hmasak vawi thumah 3-0 vekin an chak a, point kua an hlawh chhuak.
RSC lamah Vicky chuan 26 a thawk chhuak naa tum 17 a tisual a, Hafeel chuan point 18 a hmuh laiin point kua a hloh. R Lallawmkima'n point sarih hmuin tum hnih a tisual a, R Lalnunmawia'n point sarih tho hlawh mah point nga a paih.
Ramhlun North club hian point thum an neih sa an hmuh belh lo va, zirtawpni zanah league kharin a hnuai bera awm 3rd MAP nen an intum dawn a, semifinal lut turin hun tha an la nei.
FIXTURE
Jun 8, 2017 (Ningani) 8:00 PM
TNT v Chhinga Veng