Hungarian Grand Prix chu Pathianni zan dar 6:40 atangin an tlan tan dawn a, qualifying-ah Lewis Hamilton chu a tlan chak ber a, pole position a chang a, a team-mate Valtteri Bottas chu pahnihna atangin a tlan tan dawn bawk a ni.
Drivers’ championship-a hma hruai mek Hamilton hi qualifying-ah hian a che tha hle a, Mercedes hian tun season chhungin tlar hma an hauh ve ve vawi 4-na a ni ta a. Ruah tla hnuaiah pawh Hamilton hi a tlan tha viau a, a aia tlan chak hi an awm ta lo a, Ferrari driver Sebastian Vettel nen world title an inchuh meknaah Hamilton chan hi a la tha hret zel a ni.
Ni ruk kalta khan British driver Lewis Hamilton hi German Grand Prix-ah a che tha hle a, 14-na atangin a tlan tan a, mahse a tawpah pakhatna a ni thei ta tho a. Hungary bikah hian pole position hi vawi 6 a channa niin, kuminah vawi 5 a chang ta bawk a, Formula 1 khawvelah hrim hrim chuan pole position vawi 77 a chang ta chiah a ni.
Hamilton dawt chiahah hian Merecdes driver pakhat zawk Bottas a awm ang a, an hnungah Ferrari driver pahnih an awm ve leh ang a. Kimi Raikkonen chu pathumnaah awmin, a team-mate Sebastian Vettel chu palinaah a awm dawn a. Renault driver Carlos Sainz chu pangana niin, Toro Rosso driver Pierre Gasly chu paruknaah a awm ang.
Red Bull driver Max Verstappen chu pasarihna niin, Toro Rosso driver Brendon Hartley chu a vawi khatna atan Top 10 ah a lang a, pariatna atangin a tlan tan ang. Hartley hnungah hian Haas driver pahnih an awm a, pakuanaah Kevin Magnussen a awm a, a team-mate Romain Grosjean chu Top 10-ah hian a lang pha chiah a ni.
Qualifying-ah hian ruah sur hma chuan Ferrari an tlan chak ber a, mahse a hnua ruah a rawn sur chuan Mercedes chan a tha ve leh thung a ni.
Hungarian GP Qualifying:
1. Lewis Hamilton Mercedes
2. Valtteri Bottas Mercedes
3. Kimi Raikkonen Ferrari
4. Sebastian Vettel Ferrari
5. Carlos Sainz Renault
6. Pierre Gasly Toro Rosso
7. Max Verstappen Red Bull
8. Brendon Hartley Toro Rosso
9. Kevin Magnussen Haas
10. Romain Grosjean Haas
11. Fernando Alonso McLaren
12. Daniel Ricciardo Red Bull
13. Nico Hulkenberg Renault
14. Marcus Ericsson Sauber-Ferrari
15. Lance Stroll Williams
16. Stoffel Vandoorne McLaren
17. Charles Leclerc Sauber-Ferrari
18. Esteban Ocon Force India
19. Sergio Perez Force India
20. Sergey Sirotkin Williams