Lewis Hamilton chu Hungarian Grand Prix-ah pakhatna a ni a, helai hmunah hian pakhatna vawi 6 a ni ta chiah a, drivers’ championship-ah hma a hruai fal belh zel bawk a ni.
A tir atangin Hamilton hian harsatna em em a nei lutuk lo a, Hungarian GP-a a chak hian kumin bikah vawi 5 chu pakhatna a ni ta chiah a. Drivers’ championship-ah pawh hma a hruai fal tan a, amah hnaih bertu Sebastian Vettel aiin point 24 in a sang ta a ni.
He intlansiakah hian boruak sosang deuh a awm vak lo hle a, a tawp lampanga Sebastian Vettel leh Valtteri Bottas te inkar boruak bakah, Bottas leh Daniel Ricciardo te inkar boruak tlema danglam deuh tih mai loh chu thil a tluangtlam angreng hle.
Mercedes driver Hamilton chu qualifying atang tawhin a che fuh chho hle a, Inrinnia qualifying an tlanah ruah tlak hnuah Hamilton hi a rawn che tha hle a, pole position a chan theih phah a. Pathiannia intlansiakah lah a tir atangin a tlan fuh nghal hle a, a tawp thlengin harsatna a nei lo tluanchhuak a ni ber.
Hungary-ah hian Mercedes car pahnihin hma an hruai deuh char char a, a tawp lam, lap 5 chauh tlan a ngai tawh tihin pahnihnaa tlan Bottas chu Ferrari driver Vettel chuan a lehpel a, Sebastian Vettel hi pahnihna a nih theih phah a. Ferrari driver pakhat zawk Kimi Raikkonen pawhin Bottas chetsual nang fuhin pathumna a ni ve bawk a ni.
Sebastian Vettel chuan soft tyre hmangin bul a tan a, track sa tha tak maiah chuan Mercedes car aia chak zawk Ferrari car a khalh bawk avangin khaw tha hnuaiah mi tam tak chuan Vettel hi chak ber tura an rin a ni a. Ferrari hi pit stop-ah an che fuh lo a, hei vang hian Vettel hi pahnihna pawh a nih a rinawm lo hman a, mahse Bottas chuan a dang tluanchhuak thei ta lo.
Lap 65-ah Vettel hian Bottas hi felfai takin a lehpel a, Raikkonen pawhin Bottas hi a lehpel ve leh a. Bottas chuan Red Bull driver Daniel Ricciardo car chu a su bawk a, Bottas hi palina niin Ricciardo hi pangana a ni ve bawk a. Pierre Gasly, Kevin Magnussen, Fernando Alonso, Carlos Sainz Jr. leh Romain Grosjean te pawhin point an hmu ve bawk a ni.
British driver Lewis Hamilton hi amah hnaih bertu Sebastian Vettel aiin second 17 in a tawp a thleng hmasa a. Hungary-ah hian Hamilton hi vawi 6 a chak ber tawh a, Michael Schumacher hnuah hetiang zat chak ber ni thei hi an la awm lo a. 2004 khan Schumacher chu he track-ah hian a chak ber a, title a la zui bawk a ni.
Hungarian GP result
1 Lewis Hamilton (Mercedes)
2 Sebastian Vettel (Ferrari)
3 Kimi Räikkönen (Ferrari)
4 Daniel Ricciardo (Red Bull)
5 Valtteri Bottas (Mercedes)
6 Pierre Gasly (Toro Rosso)
7 Kevin Magnussen (Haas)
8 Fernando Alonso (McLaren)
9 Carlos Sainz Jr. (Renault)
10 Romain Grosjean (Haas)
11 Brendon Hartley (Toro Rosso)
12 Esteban Ocon (Force India)
13 Nico Hülkenberg (Renault)
14 Sergio Pérez (Force India)
15 Marcus Ericsson (Sauber)
16 Sergey Sirotkin (Williams)
17 Lance Stroll (Williams)
18 Stoffel Vandoorne (McLaren)
19 Max Verstappen (Red Bull)
20 Charles Leclerc (Sauber)