Kemba Walker chu mi rin loh dan angin a awm thin a, a awm belh zel a. Tunah pawh Hornets tana thun hnem ber Dell Curry lehpelin a chung berah a awm ta.

Feet 6 leh inches 1 chauha sang a nih avangin 2011 NBA draft-a Charlotte in an thlan pawh khan mi rilruah zawhna a tam tak a awm a. NBA point guard tha tak a nih theih hi tu vakin an ring lo a, mahse D.J. Augustin a khum chho nghal pang a.

Amah ringlotute chuan a lak atangin beisei an nei sang lo chho hle a, Hornets chuan 2015 khan kum 4 atan $48 million zetin contract an ziahpui a, ringhlel taka entute a chhanletna chu vawi hnih ngawt All-Star ah a tel a ni.

Spectrum Center-ah Hornets leh Cleveland Cavaliers an inkhel a, Hornets hi 118-105 in an chak lo a, mahse second 20 chauh a la awm tihin Walker hian reverse layup hmangin a thun a, kum 26 zet Dell Curry-a’n record a lo neih tawh chu a khum ta a ni.

He inkhelah hian Kemba Walker hian point 21 a thun a, LeBron James chuan point 41 zet a thun a. An inkhelh zawh veleh LeBron hian Kemba hi a pan phei a, va kuah pahin record siamtu a ni thei chu ropui a tih thu sawiin, a lawmpui thu a va hrilh nghe nghe a ni.

Kum 27 mi Kemba Walker chu lawm avangin a mittui a tla a, “Kan chak zo ta lo kha a pawi ka ti a, kha ai khan khel tha zawk ila ni tur ania. Chak lo mah ila record thar ka siam thei hi ka lawm em em mai a, ka chhungte leh keimah min tantute zawng zawng chungah in mi tawiawmna leh fuihna avangin lawmthu ka sawi e,” a ti.