Mipa nge hmeichhia a nih ? Tih test hi a ngai chho zel ta chu a ni a, hmanni lawk pawh khan Kim Karsashian-i pa Bruce Jenner chu hmeichhiaah a inlet a, hetiang transgender an awm nawk tawh avang hian Hormone test chu sports-ah a pawimawh ta hle.
Tin, transgender ni kherlo pawh, mipa thenkhat hmeichhe infiamnaa tel tumte an awm thin, chungte avang chuan hormone test hi tihmakmawh a ni ta a ni. Chutih laiin piansualna chi khat a awm ve thei, mipa thenkhat chu an taksaa hmeichhe hormone tam zawk an awm, chutiang bawkin hmeichhe thenkhat pawh an taksaah mipa hormone tam zawk an awm. Indian sprinter Dutee Chand-i pawh hian chutiang harsatna chu a tawk ta chiah mai le.
Kum 19 mi, India tleirawl tlanchak hian nikum khan hormone test a paltlang zo lo. A taksaah mipa hormone a lo tam zawk a, hei vang hian hmeichhe infiamnaah tel ve an phalsak ta lo. Dutee Chand hian theih tawpin he thutlukna diklo tak hi a bei ta a.
Court of Arbitration for Sport chuan "hyperandrogenism" dan chu evidence tha tak Athletics hotuten an nei thei lo a nih chuan hmang tawh lo turin thu a pe ta a. Chand-i chuan dan a khin letnaah hnehna a chang ta a ni. Hormone test a paltlang loh avangin Dutee Chand hian harsatna tam tak a lo tawk zui chu niin.
Chand chuan,"Mipa ka ni nge hmeichhia ka ni zawk ? Tih chu mite ngaihven a ni chho ta a, zahawmna ka hlawhchhuah zawng zawng chu ka chan ta, ka thiante atang pawhin zawhna ka dawng hnem hle, min kawmserh bawk a. Training centre-ah pawh hmeichhe awmnaah min awm tir phal ve lova, a hrangin min dah thin," tiin BBC Hindi a hrilh a ni.
Chand chuan he case-ah hian hnehna a chan ngei a inrin thu a sawi a,"Ka chak loh hi ka ring ngai lo a ni. A chhan chu tihsual engmah ka neih loh avangin. Judge-te chungah ka lawm hle a, ka duhthusamin thutlukna a thleng ta, dikna chu a dingchang ta a, hmeichhe pangai ka ni. He thutlukna ka hriat chiah hi chuan ka hlim tak zet, ka sawi thiam lo a ni ber mai, tumahin ka chungah rilru thalo an pu tawh dawn lova." tiin a sawi.
Chand hian August thlaa Beijing-a World Athletics Championships neih turah India tan a fehchhuak dawn a, 2014 Commonwealth Games leh Asian Games khan hrem a ni a, he dan hi khing hmasa ber a ni nghe nghe a ni.
picture credit : indianexpress.com