Hockey World League Round 2 champion India team-a tel Lalhlunmawii chuan May ni 20, Pathianni khan Aizawl a lo thleng a, Lengpui Airport-ah Hockey Association, Mizoram chuan an lo hmuak a ni.
Thenzawl nula Hluntei lawmpuina hi May ni 22, Thawhtanni chawhma dar 11:00 AM khan Mizoram State Sports Council chuan an Office, Infiammite inpui, Upper Khatlaah a buatsaih zui nghal.
(adsbygoogle = window.adsbygoogle || []).push({});
(adsbygoogle = window.adsbygoogle || []).push({});
April 1st -9th, 2017 chhung khan West Vancauver, Canada-ah Hockey World League Round 2 khelh a ni a, final-ah India hmeichhe team leh Chile te hun pangngaiah an in hneh tawk hnuah penalty shootout-in xhak zawk zawn a ni a, India chuan 3-1 a hnehna changin an champion ta a ni.
World League Round 2-a an champion avang hian India chuan Hockey World League Semifinal khel turin an qualify nghal a, 2017 Womens Hockey World League Semi-final hi Belgium khawpui Brussels-ah Jun 21-Jul 2 2017 chhungin neih a ni dawn a, hei hi 2018 Hockey World Cup khel tur zawnna a ni nghal ang. India player Lalhlunmawii hnenah Mizoram State Sports Council Secretary Pu C.Laltlanthanga chuan lawmpuina Kit Allownces - Rs.10000/- leh sports bag a hlan a, Hluntei bakah hian Durtlang nula K.Ngaihpari chu India senior team-a camp turin koh a ni a, an pahnih hian June 1-ah India training camp Himachal Pradesh an pan ang.
Pu C.Laltlanthanga chuan, "Veng leh veng, khua leh khua ang zawngin kan huai em em a, thahnem kan ngai nasa thin. Mahse a hnam ang zawngin Mizote kan huai tawk lo fo a, kan inchawimawi thiam thin lo fo bawk. Vawiinah erawh chuan sports hmangin hnam kan chawimawi nasa tawh a, Sports leh Mizo tih hi a inzawm tlat tawh a ni. Infiammite enkawl a, kaihruai tur pawhin tawnhriat nei thate bawk hi an tangkaiin an pawimawh a, vawiina India ram aiawh ni thei leh Mizo mai ni lo India tihmingthatu kan players tha tak takte hi nakina Mizoram sports kaihruaitu tur an la ni dawn a, chutih hunah chuan nasa leh zualin hma kan sawn ngei ang" a ti.
Lalhlunmawii hi kum 2008 khan Women's Hockey Training Centre, Thenzawl-ah a lut a, he training centre atang hian kum 2015 khan India Junior Camp tura koh a ni a. Thenzawl atang hian Gwalior Hockey Academy-ah Mizoram Hockey hruaituten dahthlain hma a sawn chho hle a, kum 2016 khan India hmeichhe senior team-ah a lut ta a ni. Kum 19 mi Thenzawl player Hluntei hian kumin kumtira India leh Belarus- in Test Match Bhopal-a an neihah khan India Team tan a khel a, World Hockey League Round-2 Canada-a neihah India Senior Team tan khel tura thlan zui leh niin match zawng zawngah hian a khel kim vek a ni.
Hluntei hi India Senior team-a naupang ber a ni a, International tournament-a champion thei player Mizo nula an nei chu an lawm thu Hockey Mizoram chuan an sawi a, Thenzawl Women'a Hockey Training Centre ( SAI extension) atanga International player pasarih an chhuak tawh thu an sawi bawk. Lalhlunmawii hi naktuk (thawhlehni) hian Thenzawl khawtlang chuan ropui taka lo hmuah an tum a ni.
(adsbygoogle = window.adsbygoogle || []).push({});