21 May 2017 01:31

Serchhip Chelsea

Hnawhchhuah tawk lo player entawntlakte

Football hi infiamna chi khat zinga tharum hman tamna a ni tih kan hre țheuh a, mize hrang hrang neiin an khel bawk a țhenkhat chuan midang tihnat an pawisa lo emaw tih tur khawpin an khel rum țhin.

Tharum leh theihtawp chhuahna kara khelh ni mahse an hun puma Red Card hmu lo an ther fur tho va, an entawntlak bakah an ngaihsanawm tel tlat.

Tun țumah hian khawvelin a hriat footballer lar, an inkhelh chhunga Red Card hmu lo kan tarlang dawn a, 'player zaidam' ti a hriatlar deuh vek an nih piahlamah inkhelh chawlhsan tawhte an ni vek bawk.

* Philipp Lahm: Germany captain hlui hian May ni 20 zan khan Bayern Munich ațangin inkhelh a chawlhsan a, kum 2001 ațangin professional football a khel a vawikhat mah a chawlh thlengin hnawhchhuah a nilo.

Kum 33 mi ni mek hian Bayern tan game 517 a khel hman a, Germany national team tan game 113 khel bawkin trophy vawi 22 a chawi.

Kum 2003 leh 2005 khan VfB Stuttgart-in loan hmangin an hawhchhuak a hetah pawh hian hnawhchhuah a tawk lo hrim hrim bawk.

Defender anih angin ball chuh vanga han chilh deuh rup rup chu nei ve bawk țhin mahse midang ti hliam chi leh dan kalh a ni ngai lem lo va, defensive midfielder ang pawhin a khel thei.

* Raul Gonzalez: 'Madrid Lal Fapa' an tih hial țhin hian a hunpumah club tan game 932 khelin Spain tan game 102 a khel hman a, vawikhat mah hnawhchhuah a tawk lo ve tho.

Schalke forward hlui hian a vanglai hun zawng zawng chu Real Madrid-ah a hmang a tih theih a, Spanish club hi La Liga-ah vawiruk a champion pui a Champions League nomawi vawithum a chawipui bawk.

* Damien Duff: Blackburn, Chelsea, Newcastle United leh Fulham winger hlui hian kum 19 zet football a khel a, Red card hmuh a nei lo.

Republic of Ireland winger hlui hian football a khelh chhungin game 632 a khel hman a, goal 83 khungin an ram Republic of Ireland tan hian game za a khel tling.

* Michel Platini: Ballon d'Or award vawithum lai dawng thei hian Nancy, Saint-Etienne leh Juventus tan a khel țhin a, kum 1976 leh 1987 inkar khan France national team tana mi pawimawh a ni bawk.

A hminglema Le Roi (The King) an tih mai țhin hian belhkhawmin club leh ram tan game 655 a khel a Red card hmuh a nei lo.

Union of European Football Associations (UEFA) president hlui hian a hunpumah trophy sawm chuang a chawi a kum 1987 khan inkhelh a chawlhsan.

* Gary Lineker: Kum 1986 World Cup-a Golden Boot dawng thei hian Leicester City, Everton, Tottenham leh Barcelona-ah te a vanglai hun a hmang a, England player zingah World Cup-a goal khung hnem ber (10 goals) a ni mek bawk.

English First Division (English Premier League ni ta)-a season thum lai goal khung hnem ber (top scorer) ni thei hian a hunpumah game 567 khelin goal 281 a khung thei a, hnawhchhuah a tawk lo hrim hrim.

Red card a hmuhloh piahlamah hian Yellow card pawh vawikhat mah a hmu lo va, entawntlak leh ngaihsanawm tak a ni.

* Ryan Giggs (red card vawikhat): Manchester United winger ropui ni țhin hian vawikhat chu hnawhchhuah a tawk ngei a, mahse an ram Wales tan a khelh laiin a ni thung.

2008-2009 season-a PFA Players' Player of the Year hian Manchester United tan game 963 a khel a, an ram Wales tan game 64 a khel hman bawk.

Kum 24 chhung Manchester United a khelh chhungin hnawhchhuah a tawk lo va an ram tan a khelh laiin (sawi tawh ang hian) vawikhat chu hnawhchhuah a tawk thung.

Red card a hmuhna hi World Cup qualifying round-a Norway an hmachhawn țumin a ni a minute 86-naah Yellow card vawihnihna a hmu a hnawhchhuah a ni.

TLANGKAWMNA: Thenkhatte'n an hunpuma Red card an hmuhloh laiin Joey Barton, Mario Balotelli leh midang tam tak chuan inkhelh an chawlhsan hma hauhin hnawhchhuah an tawk ngun tawh viau a, tuna la khel mek zingah hian Andres Iniesta, Karim Benzema leh Joao Moutinho-te ho hi vawikhat mah hnawhchhuah la tawk lo zinga langsar an ni.

* Photo: Getty