30 Nov 2017 11:55

digimalt

​Hliam enkawl dan

Doctor ka ni lova, medical lamah pawh background ka nei lo. Chutih laiin naupan tet ata inkhel nasa leh inhliam nasa ka ni a, hliam thenkhat a bikin kak leh belkang enkawl danah chuan sawi tur erawh ka nei ve nual. Ka taksa bikah chuan a dam har dan leh dam hma dan ka hrechiang em em a, chumi chungchang chu ka rawn share ve mai mai ang e.

Goal veng thin ka nih avangin kiu, khel leh khup pilh/belkang/kak hi ka ngah thin em em. A chang chuan thui ngai hial khawpte pawh a ni ve thin. Kan inkhelh ve hunlai kha chuan grass phah a la ni ve bawk si lova, lei charah kan dive thin, vun hi a hek thin em em. Tunah chuan phullem phah chungah thenkhat chu an inkhel thei ta a, heti chung hian goalkeeper te erawh pilh/kak/belkang an la nei reng tho, grass hi a dup em em hran lo, chutih laiin tunhma ai kha chuan hliam erawh a nep ve deuh.

Kan dive-naah hian kiu hi a pilh ngun hle a, a tir chuan ka tuam thin. Mahse tuam hi chuan a no duh em em, a dam har thin. Chuvang chuan heti hian ka ti thin ta a; Ka hliam chu a hlimchhawnah first aid kan pe a, in ka hawnin tui chhuanso dahvawh hmangin fai takin ka sil. Chumi zawhah Antiseptic damdawi ka hnawih a, ka tuam ngai ta lo. Inbual hian tihhuh a awl em em, a huh hi chuan a no zel bawk si nen, sarangin ka tuam ta a, tui a luh loh nan plaster hmangin ka char bet. Inbual zawhah ka phelh leh mai thin.

Hliam thenkhat chu a tui hluam hluam thin, zan mutnaah puan sin nen a lo incharh chang pawh a awm thin. Chungah chuan ka inbual dawna ka tih thin angin sarangin ka tuam thlap a, mahse boruak lut thei turin ka dah thung. A awmzia ber chu dah ro a ni deuh mai. Chutianga ka tih chuan kar khat emaw vel chhungin a hil vek hman thin.