​Hlawhtling taka GRIT MMA Professional Fight neih a ni

16th December 2017, 07:12PM

MISMA leh Zonet Cable Pvt. Ltd tena an buatsaih Mixed Martial Arts Professional Fight GRIT chu December ni 15, 2017 (Zirtawpni) zan khan Pachhunga University College Auditorium-ah hlawhtling taka neih a ni a, Mizoram State Mixed Martial Arts Association hian kum hnih chhungin Professional Fight hi vawi thum hlawhtling takin a lo huaihawt ta a ni.

Mizoram State Home Minister zahawm tak Pu R. Lalzirliana chu khualliana hman niin, Pu Zira chuan,"Hnam huaisen Mizo ten hetianga Mizoram chhung ngeia kan han ti ve thei hi MISMA an fakawm hle a, Mizoram pawn thlenga fighter tha ten fehchhuahna an nei leh zel bawk nen, hruaitu te an fakawm hle a ni. Infiamna rothap tak ni mahse a thianghlim em em a ni bawk a ni, fighter te duhsakna ka hlan e," tiin GRIT khuhhawnna a nei.

Main Event-ah The Golden Elbow Mapuia Hmar chuan Congo fighter tha Tresor MT chu Unanimous Decision-in a hneh a, Jijitsu background Mapuia fight hi a hmuhnawm hle a, fighter tha pahnih an nih avangin a tir atanga a tawp thlengin thapui tehmeuh hmangin an inbei, Round tawp berah phei chuan an chau dun hle a, referee-in chawlhlawk a pe hial nghe nghe a ni.

Co-Main Event-ah Xico leh Portuguese fighter Aboul Rahim Shaikh an inbei a, Xico hian Aboul-a kapah a do palh avangin Aboul hian fight a chhunzawm thei ta lova, he fight-ah hian chak zawk awm lovin an inthathen ta a ni.

GRIT Fight Report Kimchang :

1. Bantamweight :

Matiullah Sayedi (Afghanistan) def. Ariestone Mambha Ryndongsngi (India) {Retirement, Round 1}

A tir atangin Nasratullah a chungnung nghal a, Nasratullah hi a ban a sei a, Ariestone Mambha hian distance keep mahse a hnek fuh hnem hman hle, Ariestone Mambha-a hnar a thi zawih zawih, hemi hnu hian Nasratullah Sharifi chuan mawi takin a takedown, a thutbet a, a chhu zui mawlh mawlh, Ariestone Mambha Ryndongsngi a che thei tawh lo, Round 1 a zo a, a khel zui thei ta lo, Retirement-in Nasratullah Sharifi chuan hnehna a chang ta a ni.

2. Middleweight :

Manash Daimary (India) def. Zonunthara (India) {Triangle choke, Round 1, 4:09}

A tir atangin Zonunthara'n ground game khelhpui a tum, an inhnek lem lo, Zonunthara chuan a bawh phei a, Assamese fighter Manash Daimary chuan takedown defence a lo nei tha kher mai. Zonunthara chuan a bawhthlu ta nge nge a, hetih lai hian Manash chuan Zonunthara ban veilam a man bet tlat, triangle choke neih a tum ngar ngar a, a tawpah chuan a thei ta nge nge, Round 1, 4:09-ah Manash chuan Submission hmangin hnehna a chang ta a ni.

3. Catchweight :

Evariste Tshimanga (Congo) def. David Lalrinzuala Sailo (India) {TKO, Round 1, 42 sec)

David Lalrinzuala Sailo hi Ngura inhliam avanga hun tlemte la awma koh chawp a ni a, huaisen takin cage chhungah a lut, hetih lai hian Evariste erawh tawnhriat ngah a nih mai bakah rih zawngah pawh a rih zawk fe a, an inlenhleih hle nghe nghe. Evariste hi a tir atanga chak zawk tura rin a ni nghe nghe. Fight an tan a, vawi hnih David-a chuan Evariste-a malpui a pet, pet nat a tum hle, mahse Evariste chuan a bawh nghal a, a hnek nghal bawrh bawrh, David-a a che thei tawh lo, referee chuan fight a ti tawp ta, TKO hmangin Round 1, 42 sec-ah Evariste chuan hnehna a chang ta a ni.

4. Lightweight :

Nasratullah Sharifi (Afghanistan) def. Tekashi Zorammawia (India) {RNC, Round 1, 1:52}

Teka chuan ground game khelhpui a tum nghal a, a bawh, Nasratullah hian takedown defence nei tha hle mahse Teka chuan a bawhthlu ta nge nge. Hetih lai hian Nsratullah hi MMA fighter tawnhriat ngah tak a nih avangin an inlehthal tial tial a, Teka a hnuai lamah a tang, fimkhur lo takin lehthal a tum, Nasratullah chuan RNC hmangin a rek fuh ta hlauh mai. Round 1, 1:52-ah RNC hmangin Nasratullah chuan hnehna a chang ta a ni.

5. Bantamweight :

Xico Zorinmawia (India) vs Aboul Rahim Shaikh (Portugal) {No Contest, Round 1}

Fighter pahnihten ground game khelh an tum lo ve ve, ding chungin an inbei a, Xico chuan Aboul-a malpui a kick nual hman, cage-ah an inmanbet a, knee ve ve an intum, hetih lai hian an san dun avang leh an inpawmbeh avangin an dulah knee an inpe theilo ve ve. Xico chuan tihpalh thilthuin Aboul-a kapah a knee fuh hlauh mai, na vak niin lang lo mahse Aboul chu a tho thei ta lo, chak zawk awm lovin fight an zo ta a ni.

6. Lightweight :

Mapuia Hauhnar 'The Golden Elbow' (India) def. Tresor MT (Congo) {Unanimous Decision}

Round 1-naah fighter pahnihte an inveng tawn dun hle a, Mapuia'n Tresor-a malpui a pet nual. Tin, Mapuia hian takedown mawi takin a nei bawk a, a chhu zui nual, hetih lai hian Tresor defence a that em avangin na takin an inkhawih hman lo.

Round hnihnaah pawh cage-ah an innawrbet a, Mapuia chuan Tresor malpuiah a do fuh nual. Tin, takedown a nei chhunzawm bawk a. Mapuia hian RNC a tum a, mahse duhthusamin a kuah thei lo. Chutah Tresor chuan lehthalin a chunglamah a tang ta. A chum nual, mahse Mapuia a lo indang tha kher mai. Hun a tawp chhunzawm.

Round thumnaah Mapuia chuan takedown nei lehin cage-ah an innawr bet a, fighter pahnihte an chau dun hle a, referee chuan hahchawlhna hun a pe dun nghe nghe. Fight an chhunzawm lehhnuin Mapuia chuan a takedown lehnghal a, hetah hian a trademark elbow hmangin a chhu nual, Tresor a kun avangin Mapuia chuan upper cut a pe zauh zauh bawk. Hun a tawp ta a, Unanimous Decision-in The Golden Elbow chuan hnehna a chang ta a ni.

Photographer : Johny Ngurthansanga

Copyright © inkhel.com 2024. All rights reserved.