JJ Redick chuan point 28 a score a, Philadelphia 76ers chuan Atlanta Hawks chu 121-113 in an hneh theih phah a. Eastern Conference-ah Philadelphia hian an dinhmun an siam tha sawt hle.

Philadelphia 76ers tan rookie star Ben Simmons chu zing lamah a nuam lo a, mahse inkhelah hian a tel tho a, point 13 thunin, rebound 10 leh assist 6 a nei tho a, second 7 a la awm tihin a foul out zui a. 76ers hi a zawnin game 15 chhung an chak ta a ni.

Redick chuan 3-point arc atanga vawi 9 a shoot zingah vawi 6 a thun a, Atlanta player hlui pahnih Ersan Llyasova leh Marco Belinelli te chuan an team hlui lakah khawngaihna an lantir lem lo a. Ilyasova chuan point 26 a thun a, Belinelli pawhin point 20 a thun bawk a, an pahnih hian 3-pointer vawi 9 ngawt an thun a, Philadelphia hian a vaiin 3-pointer vawi 37 an shoot a, vawi 17 an thun.

76ers hian Eastern Conference-ah hian pathumna dinhmun an luah nghet tluk a ni tawh a, Milwaukee nen an inkhel leh ang a, an chak chuan pathumna hi an ni chiang tawh ang a. Hawks ve thung chuan playoff khelh an beisei theih tawh lohna a rei tawh a, tun season chhungin an che fuh vak lo a, record hi 24-58 neiin 2005 hnua an chet chhiat ber a la ni.