Arsenal chuan Chelsea atangin Petr Cech an lalut fel a, hunrei tak daih tur contract an ziahpui a Czech Republic goalkeeper man hi puanzar a nilo.

Cech hi Belgium international goalkeeper Thibaut Courtois chuan season liamta atang khan a nek chhuak a, kum sawm chhung chu Chelsea goalkeeper rinrawl a ni hman.

Kum 33 mi hian Chelsea tan kum khat daih contract ala nei a, season liamta khan game 16 a khel.

Chelsea-ah hian kum 11 awmin game 400 chuang a khel hman a, Premier League-ah vawili champion puiin Champions League leh Europa League-ah vawikhat ve ve an champion bawk a, FA Cup nomawi pawh vawili a chawipui a League Cup-ah vawithum a champion pui hman bawk a ni.

Kum 2004 khan French club Rennes atangin Chelsea hi a zawm a, Jose Mourinho-a'n Czech Footballer of the Year-a vawisarih lai an thlan tawh hi chelh duh viau mahse awmzia a nei dawn ta lo.

Cech hian Gunners hi khelh tam a duh vanga zawm a ni dawn a, mahse Wojciech Szczesny leh David Ospina-te a elpui dawn a Wenger-a'n tu ber nge a chhawr dawn a hriat rih loh.

Chmel Blsany atanga bul lo tan chhovin Sparta Prague-ah rei vaklo a khel leh a, kum 2002 khan Rennes-in an lalut a kum 2004 khan Chelsea-in an lei.

Arsenal manager Arsène Wenger a lawm a, "Petr Cech hi hunrei tak ata tawh ka duh a ni a, kan club zawm a remti hi ka lawm khawp mai. Season tam tak chhung khawvela goalkeeper tha zingah a tel thei a kan squad tichaktu tur a ni ang." ti a sawiin a phur hle.

Cech pawhin, "Arsenal Football Club zawm hi ka phur a pre-season ka nghakhlel tawh khawp mai. Arsène Wenger-a'n he team tana a tum leh keimah min hmanna tur min hrilh khan engkim a chiang nghal." tiin a sawi ve bawk.

Premier League Golden Glove award vawithum dawng tawh Cech hian jersey number engzat nge a hak dawn ala chiang lo va, Arsenal official Instagram account-ah an tarlang thuai ang.