Grand Slam-ah a champion theihloh vanga an sawisel fo țhin Caroline Wozniacki chuan a vawikhat nan Grand Slam champion trophy a chawi ve ta a, Australian Open hmeichhe singles final-ah Simona Halep a hneh.

Seeded number two Wozniacki hian inkhel hmuhnawm takah 7-6, 3-6, 6-4 in seeded number one Halep hi a hneh a, Romanian star lak ațang hian World number one nihna a chhuhsak nghal bawk.

Wozniacki hian Grand Slam final a khelh hmasak ber ațanga kum kua a liam hnuah champion trophy a chawi ve ta a, Denmark mipui zinga Grand Slam singles title la thei hmasa ber a ni tel bawk.

Hnehna a chan hnuin kum 27 mi chuan, "Hemi hun hi kum tam tak ka lo suangtuah tawh țhin a tun hi a tih puitlinna a ni." tiin a lawm hle.

Final-a tlawm ta zawk Halep pawh hian Grand Slam title ala vawchhuak bik lo va, French Open final-ah vawihnih a tlawm tawh bawk a tun țum hi Grand Slam final-a vawithum a tlawmna a ni.

Romanian star hian a chakloh vangin pawi ti viau mahse Wozniacki a khel țha zawk tih a sawi a, a hmalam hun ala thui thu leh final a luh leh ngei a inbeisei thu a sawi bawk a ni.