​Goalkeeper chu an mawl vah tur a ni

11th September 2017, 06:09PM

Thianho zinga a naupang ber emaw a dawih ber emaw hi goal ventir an ni thin. Mizo goalkeeper zinga tha deuh deuh pawh hi han belchiang hlawm ngat ilang chuan a naupang ber emaw an nih avanga goal ven luih tir an ni thin.

Football-a langsar ber ni ziah chu goal khungtute lam hi an ni a, Ballon d'Or dawngtur thlan a nih tum pawh hian tlar hnung lam aiin tlar hma lamin an dawng hnem zawk ziah. Best player thlan pawh hian goal khung thei hi thlan an ni fo bawk, chuvang chuan a huai deuh emaw kum lama upa deuhte kha chu naupan lai kha chuan striker nih kha an thlang zel a nih kha.

Goalkeeper hi chu leicharah pawh nise an dive bur tur hi a ni tawp mai, chuvang chuan tlema bawl theih deuhte hi goal ven tir chang lah a tam. Khawvel football-ah pawh an man hi a sang tak tak thei lo chu a ni. Hetih lai hian Goalkeeper-te ropui zia hi sawi nawn leh a ngai thin.

Tun weekend liamta khan Mane chuan Ederson hmaiah chiang takin a tlawh a nih kha, khatiang inhliamna kha goalkeeper te tawrh fo a ni a, thil mak em em a ni hran lo, thleng tur zinga ngaih a nih thin vang a ni.

Fiamthuin bul kan han tan tak na a, goalkeeper ni tura huaisen a ngaih zia leh faktlak an nih zia hi tarlan a ngai a ni. An chetthatin fak hlawh ve thin bawk mahse goal khungtute lam hian fak an hlawh zawk fova, midfielder leh defender-ten ho takin tisual mahse cover tu an la awm thin avangin goal chhuah loh chang a tam, hetih lai hian goalkeeper te erawh an tihsual hi a pawi em em a, cover-tu an awm tawh lo, a goal a ni chhunzawm mai thin, chuvang chuan mualpho pawh an hnaih bik em em ziah.

Tihsual palh a pawi em avangin goalkeeper ni tur chuan perfect nih a ngai a, fitness-ah pawh outfield players aiin an fit zawk tur a ni bawk thin. Free ball an rawn khalh a, a goal ai chuan anmahni an inpumpek, an va bawhchilh hmiah thin. Striker ten an pet dawn emaw pawh nise hliam an tuar dawn nge dawn lo pawh an ngaihtuah lo, an bawhchilh rup zel, heta tang ringawt pawh hian huaisen a ngaih tur zia chu a lang chiang khawp mai.

Free kick an pet dawn a, wall-a dingte chuan an kap emaw an lu emaw a fuh palh hlauvin an inhup hram hram, hnai setsawtah pawh nise duhthalin pet dawn mahse goalkeeper te chuan an kapah emaw an luah emaw pawh fuh dawn pawh nise pawi an ti lo, anmahni an va in thehphei thuai a, huaisen hi a va ngai dawn tak em.

Mizorama goalkeeper te phei hi chu an huaisen a ni tawp mai, grass-ah a inkhelh reng theih bik loh, lei chara dive chang a tam, an kiu leh khel hi a belkang deuh reng mai. Sap ho pawh hi grass-ah an khel ti mah ila, grass hi a chhah lem lova, an dar leh an khelte hi an sawh vung ve lek luk tho. An area an pel, kut an hmang thei lo, an ke leh an lu a ni deuh mai, chak takin striker an rawn tlan, anni lahin ball kang a nih phei chuan tauh chhuah an lo tum ve bawk, intauh siah dawn pawh nise an tlanchhe ngai lo.

Goal ven hi hna hautak tak a ni a, goalkeeper tha leh huaisente chu team innghahna an ni thin bawk. Team tana an inpumpek zia kan hriatchian poh leh an lo ngaihsanawm zia hi kan hre chiang tulh tulh dawn a ni.

Copyright © inkhel.com 2024. All rights reserved.