Liverpool-in West Brom lakah point 3 hlu tak an hlawh chhuak a, table-ah pahnihnaah an inhlangkai. Thawhtan zanah khan Manchester United an inhnehtawk pui avangin point 1 khat chauh an hlawh chhuak a, United kha hneh ni tase chuan tunah hian table-ah pakhatna dinhmun an hauh ngei ang, mahse, thil nih tur ang a ni vek tawh a, thlak danglam theih a ni tawh lo. Naktuk zanah Manchester city an khel anga an result a zirin table hi a danglam leh thei bawk.
Liverpool 2-1 West Brom
Liverpool: Mane 20, Coutinho 35
West Brom: McAuley 81
Starting lineup:
Liverpool: Karius, Clyne, Matip, Lovren, Milner, Can, Henderson, Lallana, Mane, Firmino, Coutinho
Subs: Wijnaldum, Sturridge, Klavan, Moreno, Lucas, Mignolet, Origi
West Bromwich Albion: Foster, Dawson, McAuley, Olsson, Nyom, Fletcher, Yacob, Phillips, Chadli, McClean, Rondon
Subs: Robson-Kanu, Morrison, Gardner, Brunt, Myhill, Galloway, Leko
Liverpool-in thu lawmawm an nei a, Adam Lallana a dam chiang tawh a, starting lineup-ah a rawn tel a, Manchester United an hmachhawn tuma khel tha tawklo Daniel Sturridge erawh bench-ah a thu thung. Wijnaldum pawh bench a thu turin a fit tawk tawh a, Liverpool an dam kim tawh a tih theih awm e.
West Brom lamah erawh hrem vanga khel theilo Jonny Evans aiah Jonas Olsson a rawn lut ve bawk a. Liverpool hmachhawn tur hian february atanga goal khung tawh lo Saido Berahino chu a khel lo bawk.
Inkhel an tan a, thawhtan zana Manchester United draw-tu Liverpool-in inkhel bul an tan tha a, West Brom lam pawh an khel chhe em em lo. Minute 18-naah Liverpool in chance an nei hmasa a, Henderson-a ball cross chu Liverpool left back James Milner chuan a head a, mahse, a goal lo tlat.
Hemi hnu lawk hian Liverpool-in an zia an chhuah a goal hmahruai an khung nghal. Firminho ball cross tha zet mai chu, Mane-a'n chiang takin minute 20-naah goal-ah a chan tir a, Liverpool-in hma an hruai zui. Firminho hi kumin chhungin Liverpool goal thunnaah vawi 17 lai a inrawlh tawh a, goal 12 leh assist vawi 5 a nei tawh. Ani aia goal khungnaa inrawh tam hi Liverpool-ah an awm lo.
Liverpool-in an nawr chhunzawm a, minute 32-naah Lallana a rawn lang a, box chhung atangin rem zanlo chungin a pet a, uiawm takin goal chhungah a shot lo a, a sang hret a ni. Minute 35 a ni a, Coutinho a rawn lang zui ve lehnghal a. West Brom keeper Foster ball pet chhuah chhe tak chu Mane-a'n a chang a, ani hian box chhung a um luh turin Coutinho ball a pe a, Coutinho hian defender pahnih a bum hnuah Foster-a dinglam sirah lei hrulin cool tak maiin a pet goal.
Hemi hnu hian hlauhawm han tih tur em em a awm lova, Liverpool hian 2-0 a hma hruai chungin first half hi an khar.
Second half an tan a, Liverpool thoin inkhel an thunun a, West Brom hian han nawr ve zeuh thin mahse an hlauhawm tawk thin lo a, hun tha an insiam thei meuh lo.
Liverpool an chungnung chhunzawm zel a, inkhel pawh an thunun chhunza zel. Minute 57-naah Liverpool-in counter attack atangin rang tak maiin an nawr a Coutinho ball pass chu Firminho-a'n a shot a, Foster-'n tha takin a dang tlat. Minute khat chauh a ral hman tihin Coutinho free kick chu Lovren-a'n tha takin goal-ah a head a. West Brom keeper Foster chuan ropui takin a lo dang sak leh tlat.
Liverpool hian nawr viau mahse goal-ah an vannei thei tlat lo. Coutinho, firminho, Lallana leh Mane te counter attack a an ball in pe kual vel a hmuhnawm a, West Brom an awm mai mai lo chiang kher mai. Liverpool hian an nawr zawt zawt ni berin a lang. Minute 67-naah Foster fiahin a awm leh a, Milner shot a dang leh.
West Brom-in minute 75-naah counter atrack hmangin hun tha an nei ve leh a, bench atanga rawn lut Morrison chuan Liverpool goal lamah shot a nei a, mahse, Karius tan buai ngai lovin, Morrison shot hi goal kham chung lamah a kal.
Minute 81-naah West Brom lamin free kick atangin chance an nei a, mahse, free kick hi an hmang tangkai zo lo a corner an hlawh chhuak zui. Corner atanga ball rawn kal hi McAuley hmaah a tla a, Liverpool defender ten an mark loh McAuley hian goal-ah a khung a 2-1 a ni ta.
West Brom beiseina a nung thar a, inkhel pawh a nung sawt. Hetih lai hian Liverpool counter attack a rang em em a, chance tam tak an insiam a goal erawh an khung belh thei tawh bik lo. West Brom tan Foster a langsar ber ti ila kan sawi sualin a rinawm loh. Liverpool attack tha tak takin a dang sak a, zanin zet chu a che ropui hle.
West Brom an tang a, mahse, a tlai hret tawh. Hun tawp a hnai a, hun tawp hmain Liverpool-in hun tha an nei leh a, counter attack hmangin an nawr a, bench atanga rawn lut Wijnaldum chuan goal-ah a shot a mahse, a sang hret a. Goal kham chung lamah ball a kal. Goal dang a luh belh tawh lo a, 2-1 in Liverpool hi an chak ta a ni.
A naute khelh danah Jurgen Klopp a lawm a, "Ka naute khelh danah ka lawm hle. Ball kang a tam a, set piece-ah West Brom kha an hlauhawm hle a ni."
"Kan khelh dan en khan draw result kan nei a nih chuan a awiawm loh hial ang. Hetiang team lakah hian kan khel tha hle a ni. Thil enge maw hlawhchhuah tumin an lo kal a, mahse, an game a an luh kha kan phallo a ni ber e"
Corner-ah an tha takzet a, corner an hmuh apiang khan kawr var ha mi 15 vel box chhunga awm ziah ang a niin ka hria. Rilru pe tak leh pangai taka awm kha thil harsa tak a ni. Team tha tak an ni a, ka naute ka neih avang hian ka lawm hle a ni" tiin a sawi.
West Brom manager Pulis chuan Liverpool theihna a fak a, "Kan mamawh ang theihna kan neilo a, squad erawh kan insiamtha thung. Tihsual an nei a chu chu kan hmang tangkai, mahse, vawiin khan an thawkrim hle a ni." tiin a sawi.