Mizote hian football kan ngaina hle, hetih lai hian goal khung thei emaw tlema ball khalh deuh pur pur ang chi player ngaina kan tam hle. Player langsar lem lo, mahse team tana tangkai zet si erawh football fans tak takte chuan an hre nalh nalh thin.
World Cup 2018 khelh zawh takah khan France an champion, France striker Olivier Giroud khan goal khat pawh a khung lo, an coach Deschamps-a'n a luhtir ve ziah thin bawk nen, thenkhat chuan, "Zeilo lutuk, nep lutuk," te kan ti a nih kha. A hmatawnga awm ve si; goal khung si lo chu zei lo tih pawh a awm thin khawp mai. Hetih lai hian Centre Forward/Centre Striker/Lone Striker/Target man kan tih te tangkai zia hi tlem tarlang teh ang.
Tunlai football team mamawh Target man
2018 World Cup Semi final lut te khan Target man an nei vek. Lukaku, Harry Kane, Madzukic leh Giroud te han sawi bik ta ila, heng foward te hian Dutch forward Nistelrooy te chu an phak lo tih chu kan chiang tlang. Tin, Ronaldo The Phenomenon phei chu tluk phak reng an la awm rih lo a nih hi.
Tunlai football khelh dan inthlak danglam zelah hian Centre Forward/Target man mamawhna hi a sang tak zet. Goal an khung bawk a, goal an khung lo pawhin midang tan chance tam tak an lo siam sak thin bawk. Kan hriat atana tha chu goal khung hi an hna ber a ni lem lo tih hi a ni.
League-ah pawh, Cup tournament-ah pawh, coach ten an ngaihpawimawh hmasak ber ni tawh chu goal chhuah loh phawt a ni thin. Striker pahnih dah ai chuan 4-5-1 formation hman an thlang tawh zawk. 4-2-3-1 te, 4-3-3 te leh 3-5-2 te an hmang thin, mahse ball an chan loh chuan 4-5-1 ah rang takin an formation an siamrem lehnghal thin. An attack erawh chuan 4-3-3 ah an insiamrem tlangpui bawk a.
Target man tha tak hmatawngah a awm chuan goal pawh a khung thei bawk a, goal a khung loh pawhin midang tan chance a siam thei tih hi an thupui ber a ni. Chuvang chuan hmatawnga player tha tak pakhat dah chu coach te duhthusam a ni thin. Kumin World Cup semi final lutte hmatawng erawh an ropui vak lo kan ti hlawm ang, mahse coach-in game a khelhpui dana player pawimawh ber pakhat an ni tlat si.
Final-a France-in target man an hman dan
France khan defensive-a khel thei midfielder tha an nei, Croatia khan nawr an tum khan France lam khan man marking an nei a, player pakhat emaw an dah free a, side-a awm forward-te leh central midfielder-te kha an inchet chhawk a ni ber mai. Chutah Croatia-in ball an hloh a, rang takin France lamin ball an in pass, Pogba ball vawrh a tha bawk si, Mbappe a tlan thei em em bawk nen, a sir lamah chak takin ball an tlanpui thin a nih kha.
Kha tactic kha final match-a Deschamps-a'n a hman ber ni mahse Croatia midfielder te an that ve bawk em avangin France tan a sir leh a lai lama ball in pass kualna tur a awm loh chang a tam thin. Chutah tak chuan Giroud-a pawimawhna a lang ta. A pa lian a, tlar hnung atangin a kangin ball an vawrh pawp, Giroud-a'n a kianga forward dang awmte tan emaw midfielder tan emaw a tauh a, a lathlain a pass chhunzawm thin bawk.
Kha khan Croatia tlarhnungte a pawt chhuak a, a sir leh a laiah France khan hmunthawl an neih phah ta thin a ni. Giroud khan goal khung lo mahse France-in tactic an thlak zung zung theih nana player tangkai ber pakhat a ni tih heta tang hian kan hre thei awm e.
Tin, Giroud, Kane, Lukaku leh Mandzukic te hi player chhia an ni lova, chance tha an hmuh chuan goal pawh an khung zawt thin. Chutiang player an nih avang chuan defender te tan ngaihthah chi an ni lo, defender pakhatin a ven deuh reng a ngai a, defender dangin an ngaihven reng a ngai bawk a, anmahni chauhin lehlam goal bulah an tlafal, player pahnih khat an lo pawt peng ta thin a, chu chuan a sir lamah emaw hmun thawl a siam ta thin a.
Centre forward tha an khelh reng rengin goal an khung loh pawhin an kianga forward dang ten goal an khung leh nge nge thin. Perisic te, Mbappe te, De Bruyne te leh Hazard ten chance an neih theih thinna chhan pawh an centre forward ten hmun thawl an siam sak thin vang a ni thin.