​German Cup Champions Borussia Dortmund

28th May 2017, 07:05AM

A zawna vawi thum ngawt DFB Cup final-a an tlawm hnuah Borussia Dortmund chuan 2-1 in Eintracht Frankfurt an hneh a, 2017 DFB Cup an chawi ta a ni.

Tan atanga minute 8-na lekah Dembele chuan Dortmund tan goal hmahruai a khung. He goal hi 29 mins-ah Rebic chuan Eintracht Frankfurt tan a rul. Second half 67 mins-ah Dortmund chuan Christian Pulisic hmangin penalty an hlawhchhuak a, Aubameyang chuan Dortmund tan penalty chu mawi taka chip goal-in, he goal hi an champion pui ta a ni.

Eintracht Frankfurt tan hian Haris Seferovi chuan post a pet per a, Timothy Chandler pawhin a tauh goal teuh hle. Hetih lai hian inkhelh chhung zawnga team tha zawk chu Dortmund niin, goal hnih aia tam khung theihna chance an nei.

Aubameyang hian goal a khung hnuah goal dang a khung teuh hle a, box chhung atanga a thuai chu a kual lut teuh hle a, Eintracht Frankfurt goal cross bar a per.

Tin, Dembele cross tha zet chu Aubameyang hian volley-in, Eintracht Frankfurt defender Marco Fabian chuan a lo dang kawi hlauh a, Eintracht Frankfurt goal bar a per hlauh.

Tun season-a goal 40 khung tling Aubameyang hi final-a player langsar ber a ni a, Dortmund tana a game hnuhnung ber a ni maithei a ni. Dortmund chhuahsan dilna hotute hnenah a thehlut tawh a, Manchester City, Manchester United leh PSG te nena sawi zawm mek a ni.

Dortmund hi Bundesliga-ah pathumna an ni a, Champions League-ah an bus bula bomb a puah avangin an duhthusamin quarter final match an khel tha thei lo, Monaco lakah an tlawm.

A zawnin vawi 4 DFB Cup final khel Dortmund hi a vawi linaah an champion ta a ni, Bayern Munich vawi hnih an hneh loh bakah Wolfsburg vawi khat an hneh lo, Eintracht Frankfurt lakah erawh hnehna an chang ta a ni.

Copyright © inkhel.com 2024. All rights reserved.