April ni 18, Nilaini tlai khan Dr Michael Feiner, Consul General, Federal Republic of Germany, Kolkata leh Mizoram Football Association hruaitute Hotel Floria, Aizawlah thawhho dan tur an sawiho.

(adsbygoogle = window.adsbygoogle || []).push({}); 

MFA aiawhin President Pu Lal Thanzara leh Honorary Secretary Pu Lalnghinglova Hmar-te'n Dr Feiner hi an lo dawngsawng a ni.

MFA President chuan Mizoram leh Germany-in football lama thawhhona rei tak chhung an lo neih tawh dan a hrilh a, Kolkata-a Consulate General of Germany office kal tlanga thawho zui theih dan turte a zawt.

Dr Feiner chuan Mizoram Football Association leh Germany lamin football-a inkungkaihna a neih chu a hriat thu leh, Mizorama a lo kala a mi kawm hmasak ber chu MFA an nih thu a sawi a, football lama Mizoram puih theih dan tur a ngaihtuah tur thu a sawi.

MFA Honorary Secretary chuan kum 2012-a German Consul General lo zin nen an inkawm hnua ani ruahmansak anga German coach pahnihin Mizorama coach-te training an pek thu te, kum 2014-a Bundesliga club Hoffenheim an lo zin thute leh German Student's National Team-in kum 2016-a Mizoram an tlawh thute a sawi a, Germany aṭanga football team eng emaw ber an lo kal leh theihna tura ruahmanna siampui turin a sawm bawk.

German Consul General chuan football hmasawnna tur piah lamah state-in kawng hrang hranga hmasawnna tur a neihte chu a theih anga a bawhzui tur thu a sawi a, MFA hruaitute sawipui angin hmeichhe football lamah pawh tih theih a neih chuan thuneitute sawipui a tum thu MFA hruaitute a hrilh.

Dr Feiner hian April ni 19 tlai lamah Lammuala MFA Grassroots training kalpui chu a tlawh ang.

(adsbygoogle = window.adsbygoogle || []).push({});