Manchester city manager Pep Guardiola chuan a career a hun duhawmlo ber pawl a hmang chho mek a, game ruk chhung chak result an nei tawh lo a. Hei hi Pep hian a hai lo a buaina tham a nih tawh thu a sawi rualin an insiamthat theih tur thu a sawi bawk.
Nizan EFL Cup a Manchester derby-ah Pep Guardiola naute hi Manchester United midfielder Juan Mata goal khat hmangin an chak zo lo leh ta a. Heti hian Pep hian game ruk chhung a zawnin chak result a nei tawh lo. Hei hi a career a chak result a neih loh rei ber tum a ni ta.
Guardiola chuan, "Ni e, game ruk a ni tawh a, dinhmun duhawm tak a ni lo. Competition pakhat atangin kan tla a mahse, a dang pathum kan la nei. Hmalam kan pan zel ang. Ka player-te chungah ka lawm a, hmalam hunah insiamthat ngei kan tum ang." tiin a sawi.
League cup atanga an tlak avang hian trophy pathum FA Cup, Premier League leh Champions League chauh beisei tur an nei tawh.
Second half a Juan Mata goal chauh hi inkhel ti danglamtu a ni a. Guardiola chuan inkhel chungchang a sawi lang bawk a. A player-te khelh danah a lawm a a fak bawk.
"Aleix kha beisei phak bakin a khel a, Pablo Maffeo pawh chuti bawk. [Marcus] Rashford leh [Paul] Pogba kha an dang tha hle a ni."
"Kan khel tha a. Kan khelh danah inchhirna tur kan nei lo. A tawp thleng khan theihtawpin kan bei a ni."
"Naupangte te an khel a Kelechi [Iheanacho] kha kum 20 a ni a, Leroy [Sane] pawh kum 20, Pablo pawh kha kum 19 chauh a ni bawk a. An tan experience tha tak a ni. Fernando kha midang tanpuiin a khel tha hle bawk." tiin Guardiola hian a sawi.