​Futsal hmakhua a eng

19th September 2017, 08:09PM

Vawiin September ni 19, 2017 (Thawhlehni) atang hian MFA Futsal League play-off khelh tan a ni a, team 25 awmin heng zingah hian team 16 te chuan League an qualify dawn a ni. MFA Futsal League hi kum thar lam atanga tan tura ruahman a ni.

Football Association khan an player-te skills-ah an hnufum bik zia an hriatin a chhan nasa takin an chhui, chuta an hriatchhuah tak chu street football/ 5-a-side football an lo hlamchhiah vang lo ni a. Brazil leh South America lam chuan player thiam danglam bik an neih mawlh mawlh laiin England atang chuan player thiam danglam bik an chhuak khat.

England-ah hian Football academy tha tak tak a awm, hetah hian techniques leh tactics an zir nasa hle, chutih laiin ball thiam tak tak erawh an nei lem lo, ball chawh vel hi chu mahnia kawng dung vela zir reng theih a ni tih an hria. Chuvang chuan Academy football mai bakah field tea inkhelh an tuipui chhoh leh a tul tih an hrechiang a, nikum hmasa atang khan Futsal lam hi nasa takin an promote chho leh ta a ni.

FIFA pawhin Futsal a ngaipawimawh a, mumal taka kalpui a tum tak avangin ram hrang hranga Football Association te pawhin hma an la tan chho nghal mawlh mawlh a. AIFF pawhin theih tawp a chhuah a, chumi hnung zui chuan Mizoram Football Association pawhin hma a la chho ta bawk. Futsal League mumal tak buatsaih tumin play-off a huaihawt ta a ni.

Mizote tan Futsal-ah hmakhua a eng

Mizote hi kawng leh kawt zawl awl dek deka inkhel zel mai hi kan ni a, hei hian skills lamah pawh nasa takin min pui tih a chiang. Tun hma deuh kha chuan Techniques leh tactics lamah I-League player te kan tluk lo hle niin kan hria, a dik pawh a dik, chutih laiin MPL kan han tan chhova, Mizo player te skills that zia chu hahipa sawi a ni ta a nih kha.

National Championship te a la rawn awm chho dawn, Mizoram aiawh Futsal team tirh a la ni chho zel dawn bawk. India team-a luhna chance a tha chho dawn hle niin a lang. Futsal-ah na na na chuan phai lam player te ai chuan Mizo player te an tha dawn tih hi thil chiang a ni a, International level-ah Mizo player an la kat nuk dawn tih hi a rinthiam theih.

Futsal Team enkawl a hautak lo

Mizoram Premier League club neih hi a hautak hle tih chu tu pawhin kan hria. MBBA lamin Mizoram Super League an nei a, hei erawh tlemin a ziaawm deuh, Futsal Team phei chu veng tin neih theih a ni tih a chiang. Hei vang hian tun tuma play-off khelh turah pawh hian veng tam tak chu an phur hle nghe nghe a ni.

MFA Futsal League hi TV lamah live telecast tum a ni a, Mizorama Sports event/league hlawhtling ber pakhat a ni thei dawn niin a lang.

Copyright © inkhel.com 2024. All rights reserved.