Football chanchina left-back ropui sawi apianga mi tam tak rilrua lo lang nghal tur Brazilian Roberto Carlos a'n full back tha ni tura pawimawh a tihte lo tarlang teh ang.
Real Madrid legend Carlos hi 5 July 2015 khan ISL club Delhi Dynamos head coach atan lakluh a ni tawh tih kan hre theuh awm e.
A tawp thlen
Kei anga khel thin full back nei team te tan chakna lai leh chak lohna lai a awm thei. Rang tak taka attack puih hi a thatna tam tak a awma, goal thun theihna kawngah kan tangkai thei hle. Hnunglama space awm erawh team chhiatna a ni thei thunga, mid field ah ball hloh loh hram hram a tha bera, kan tlanchhuak ta rau rau a nih chuan a tawp thleng thlen rak tum thin a tha.
I hun thlang thiam rawh
Ball pass kal tluan laia ball hloh tu nih tum loh hram a tha. Ball hloh erawh chuan lak let leh vat tuma beih a tha a, attack tluan laiin attack ti na zual turin awmna hmun tur dik taka awm theih nan rilru zawng zawng pek a tul hle bawk.
Ngaihtuahna hman zung zung tur
Mual sirah ball ka changa, mual lai lamah ka pass a, mual lai atanga ball lo kal leh tur dawng turin ka insiam rem nghal thuai thuai thin. Ball ka chan laiin ngaihtuahna ah thil panga tal ka dah ngei ngeia, thaa ka ngaih ber ka zawm mai. Thutlukna siam thiam te pawh a ngai khawp mai.
I tlanpui hre rawh
Zidane khelhpui kha nuam ka ti hle. Ani kha no 10 player dik tak a ni a, a laia ball lakluh a thiama, a sira tlan a nih tir pawhin a first move chu a laia luh a ni deuh zel. Khang khan ka tan hmun awl a siam tam phaha, attacking full back ka nihna angin a sira ball lo chan kan thiam tur a ni. Ball kan hmu lawk lo a nih pawhin a kang tala an pass theihna turah kan awm thiam a pawimawh. Zidane-a khan a thiam em em a, khang vang khan a bula khelh nuam lo ti kan awm ngai lo.
Full back chhaih buai
Opponent te full back kan tlangpui winger nen kan chhaih buai hneh phawt chuan hna a ti awlsam a ni mai. 2v1 chance kan hmu a nih phawt chuan hmaih reng reng loh tur. Counter-attack ah chung chu a tam duha, ngam taka attack ve thin a tha. Chutianga kan che kan che thei a nih chuan opponent ten kan counter hlauin min attack na ngam lo mai thin.
A kar awl dah khah
Winger te puiin kan tlanchhuak tlangpuia, kei emaw ka teammate ten ball an hloha tlan let a ngaihin taima taka tlan let a fuh ber fo. 70m em em tlan chhuah tawh hnua cover let leh vek kher a theih nghal zut lova, defensive midfielder ten min lo cover sak hman tlangpui. Defensive midfielder te hmun kalsan cover turin 40m te tal chu kan tlan let ve ngei ngei tur a ni. Attack a zawh hma chu nghet takin kan ding ve tur a ni a, attack a zawhah kan position ngaiah kan lut leh mai ang.