Pathianni zan 6:30-ah French Open mipa final khelh a ni dawn a, Nadal leh Wawrinka an inhmachhawn dawn.

Switzerland mi Wawrinka hian kum 2015 khan French Open-ah hian a lo champion tawh a, kumina a champion leh a nih chuan a vawi hnih dawn tihna a ni.

Hetih lai hian a khingpui tur Rafael Nadal erawh a champion a nih chuan a vawi 10 nan French Open title a la dawn tihna a ni.

Semi final-ah Naldal chuan darkar 2 leh minute 7 lek chhungin Novak Djokovic hnawtchhuaktu Dominic Thiem chu 6-3 6-4 5-0 in a hneh a, Stan Wawrinka chuan 6-7 (6-8) 6-3 5-7 7-6 (7-3) 6-1 in World number one Andy Murray a hneh bawk a, final hmuhnawm tak a ni dawn chiang e.

Murray leh Wawrinka te hi darkar 4 leh minute 34 lai an inkhel a, kum 32 leh ni 75 mi Wawrinka a chungnung ta zawk a ni.

"Chak turin ka game khan a phak lo hrim hrim a ni. Chak theihna chance chu ka nei ve, kha aia tha khan khel ilang chuan thil a danglam thei ngei ang," tiin chak lo zawk Murray chuan a sawi.

Hmeichhe lamah Halep chuan 6-4 3-6 6-3 in Plíšková a hneh a, Ostapenko chuan 7-6 (7-4) 3-6 6-3 in Bacsinszky a hneh bawk a, inrinni zan dar 6:30-ah Halep leh Ostapenko te hian final an khel dawn a ni.