Frank Lampard chuan February ni 2, 2017 khan kum 38 mi niin Football khelh a chawlhsan thu a puang. Lampard hian football a chawlhsan tih a sawi rual hian Liverpool captain ropui ni țhin Steven Gerrard-a hming a rawn lang ve nghal nawlh bawk a.
Lampard leh Gerrard-te hi an chawl ve ve ta a, he midfielder țha tak pahnih hi khaikhin an ni reng tawh dawn a ni.
Lampard nge i thlan dawn Gerrard?
Reds lam chuan, "Gerrard hi player ropui a ni, Liverpool ti Liverpool-tu a ni," an ti. Blues lam pawhin, "Lampard hi Chelsea mihrang a ni, a hun laia English midfielder țha ber a ni," an ti ve bawk.
Lar hunlai inang an ni a, an position pawh a inang, an career leh an khelh dan hrim hrimte kha a inang em em, generation khata awm an nih avang khan khaikhin pawh an hlawh dun hle a ni.
Lampard hian league game 649 a khel a, West Ham-ah bul tan mahse loan-in Swansea a pan a, chutah West Ham-ah a kir leh, West Ham-ah a lar chho tan a, Chelsea-in an la, a hmangaih Chelsea chu a duh lo chung a chhuahsan ta a, New York City lam a pan, Manchester City lamin off-season-ah an hawh leh bawk. Tichuan a football khelh hunchhung a hmang zo ta a ni. Gerrard erawh Liverpool-ah a hun tha zawng zawng a hmang zova, LA Galaxy lamah a career tawp lam a hmang ta a ni.
League-a an khelh chhoh dan
Chelsea legend Lampard hian kum 1995 khan West Ham-ah bul tan mahse loan-in Swansea lamah an kaltir nghal a. Kum 1996 January thla khan 3-2 a Coventry an hneh țumin John Moncur thlakin West Ham tan Lampard hian a debut game a khel.
Lampard-a'n a debut game a khelh ațanga kum khat hnuah Gerrard chuan Liverpool kawr hain English Football a luhchilh ve a, a țhat lai zawng Liverpool tan a khel ta a ni.
Lampard hi Chelsea mihrang a ni tia sawi theihna tur kawng tam tak a awm, Chelsea tana goal khung hnem ber a ni bawk. Hetih lai hian Gerrard erawh Liverpool tana a chet dan a ropui hle a, team khai dingtu tak tak a ni.
Goal pawh an khung thei dun hle a, Lampard chuan Premier League game 609 a khel a, goal 177 a khung. Gerrard chuan Premier League game 504 a khel a, goal 120 a khung a ni.
2009-10 season khan Lampard a che ropui hle a, game 36 atangin goal 22 a khung, a vawi thum nan Premier League title a la. Hemi hma hian 2004-05 leh 2005-06 season-ah te Chelsea tan Premier League title a la tawh bawk a ni. (inkhel.com)
Gerrard-a'n Premier League a chawi teuh ber țum chu 2013-14 season kha a ni a, an champion ngei dawn nia a lan laiin Gerrard a chesual hlauh mai, an champion loh phah ta a nih kha. Khami season khan goal 13 a khung bakah assist vawi 13 a nei a ni.
Trophy an lak zat
Lampard v Gerrard
Premier League : 3:0
FA Cup : 4:2
League Cup : 2:3
Champions League : 1:1
Uefa/Europa : 1:1
Super Cup : 0:1
Community Shield : 2:1
Kum 2005 khan Barcelona leh Brazil forward Ronaldinho chuan FIFA World Player of the Year award a dawng a, Lampard chu pahnihna niin, Gerrard chu pathumna a ni. Khami kum khan Gerrard chuan Uefa Club Player of The Year lawmman a dawng a ni.
Tu man nge to zawk ang?
Football finance expert Rob Wilson ngaihdan chuan player pahnihte hi thla hmasa khan hralh ni ve ve se, Lampard man a san zawk a rin thu a sawi. Manchester United-in Pogba an leina man £89m chu an phak dawn lo chiang, hetih lai hian an tlawm chhe hran lovang. Lampard chu £60m velin an la lei duh Rob Wilson hian a ring a, Gerrard erawh £50m man vel niin a ngai.
Ram tana an fehchhuah dan
Kum 2002 khan ram tan an fehchhuak tan ve ve a, Lampard leh Gerrard hi ram tan vawi 73 an khel dun, kum 2014 nipui lai khan ram tana inkhelh an chawlhsan ve ve a ni. Mi tam tak chuan he midfielder pahnihte hi an khelh dunin 'an indip' an ti țhin, an khelh dun țumin 63% an chak a, an khelh dun loh țumin 51% an chak thung.
Lampard tel lovin (inkhel.com)Gerrard hi England tan vawi 41 a khel a, 61% a team a chakpui. Lampard erawh Gerrard tel lovin vawi 33 khelin 48.5% an chak a ni. Gerrard aiin Lampard hi England team-ah koh ni hmasa zawk mahse England coach ten Gerrard an thlang ngun zawk a. Major tournament-ah Gerrard hi țum thum ngawt ram captain a ni nghe nghe.
Kum 2002 World Cup-ah khan Gerrard chu ram tana koh a ni tawh a, hetih lai hian inhliam avangin hetah hian a inlan lova. Euro 2000 pawh khan England tan a inlan tawh nghe nghe. Lampard erawh Euro 2004-ah major tournament a vawi khat nan a khel ve chauh a ni.
England-in player naupang țha tak tak an nei chhova, golden generation an ti ve hial. Chutih laiin midfield-ah harsatna an tawk tlat, (inkhel.com) mi tam takin Gerrard leh Lampard-te hi khel dun chi niin an hre lova, an position a inang si, an khelh dan style pawh a inang bawk si, team tan an khelh dunin an tangkai lo niin an ngai. Mahse BBC Sport football analyst Pat Nevin erawh chuan player-te pahnih vang niin a hre lova, manager-ten an chhawr thiam loh vang niin a hre zawk.
"Gerrard leh Lampard khel dun hi buaina a ni lo, buaina zawk chu manager-te'n game an khelhpui dan zawk a ni. England formation pangngai 4-4-2 an hmang a, he formation-ah hian anni pahnih hi an kheldun thiam lo. Hmun awl zawngin an tlan chhuak thut thut țhin a, mahse an khelh dun chuan tlanna tur an hre ngai lo a ni," tiin Pat Nevin chuan a sawi.
Tu khelhna team nge țha zawk?
Gerrard-a khelhna team Liverpool hian Premier League an la chawi lo, hetih lai hian Lampard chuan a vanglaiin a chawi nual, trophy lak tam zawng leh goal khung tam zawng ațanga chhut chuan Lampard a chungnung khawp mai, chutih laiin an khelhna team hi bih chiang ila, Lampard hi World Class players zinga a khelh vangin a che țha tihna em ni? A tu zawk hi nge team khaidingtu?
Champions League hi club inelnaa chungnung ber a nih avangin an champion kum ve vea an team kha han bih ila, kum 2005 Champions League final-a AC Milan lak hnehna an chan țum khan Liverpool first XI chu, Dudek, Traore, Carragher, Hyypia, Finnan, Gerrard, Alonso, Riise, Kewell, Garcia leh Baros te an ni.
Istanbul-ah khan first half-ah si thum faiin Milan khan hma an hruai, second half-ah Gerrard chuan a thiante nasa takin a fuih a, goal 3 ngawt an khung ve ta mai. 3-3 in hun a tawp a, penalty shootout-ah hnehna an chang a nih kha. Kha match kha, 'Miracle of Istanbul,' an ti hial a ni. Khami țuma Liverpool player-te kha an țha tawk em? Tih enna pakhat chu ram tan an khelh hnem dan atangin a ni thei ang. (inkhel.com) Kha XI ten ram tana an khelh belhkhawm chu vawi 635 a ni a, Gerrard leh Alonso chuan ram tan vawi 114 ve ve an khel a, Riise chuan Norway tan vawi 110 khelin, Finland tan Hyypia chuan vawi 105 a khel tling bawk a ni.
Liverpool-in Champions League trophy an chawi ațanga kum 7-ah Chelsea chuan an chawi ve a, German ramah ngei Chelsea chuan penalty shootout hmangin Bayern Munich an hneh a nih kha, khami țuma Chelsea XI chu, Cech, Cole, Luiz, Cahill, Bosingwa, Lampard, Mikel, Bertrand, Mata, Kalou leh Drogba te an ni. Kha XI te ram tana an inkhelh zat belhkhawm chu vawi 784 niin, Cech chuan Czech Republic tan vawi 124 a khel a, Lampard (106), Cole (107) leh Drogba(104) te an ni.
Turkey-a Milan hnehtu Liverpool first XI man belhkhawm kha £40.35m a ni. Bayern Munich hnehtu Chelsea XI man belhkhawm erawh £140.1m lai a ni a, Fernando Torres (£50m) leh Michael Essien (£24.5m) kha bench-ah an țhu a, anni man hi belh tel a la ni lo zui bawk a ni.
Enge an sawi?
Manchester United leh Everton defender ni țhin tuna football pundit ni ta Phil Neville hian Gerrard leh Lampard-te hi ram tan a khelhpui țhin a, "Frank-a'n goal a khung chuan Stevie tan goal khung ve a ngai. Hei hi player ropuite tih țhin dan a ni a, Cristiano Ronaldo leh Lionel Messi te inel ang hi a ni, hei hi thil țha tak a ni bawk.
"An țhatna lai hi an khelh dun hleihtheih lohna chhan niin a lang. Stevie hi kei chuan a team tan a thawhhlawk zawk niin ka ngai. Frank erawh team ropui takah a khel a, league titles a la nual bawk, chutih laiin Gerrard erawh a khelh țhat leh țhat lovah Liverpool kha a innghat nasa em a ni," tiin Phil Neville chuan an hmelma captain Gerrard țha a tih zawk thu a sawi a ni.
Inelna a la tawp lo
England-a hun an hman zawh hnuin US an pan ve ve a, chutah football khelh an bansan, inelna a la tawp mai lo, player pahnihte hian coaching lam an luhchilh ve ve a.
Gerrard chuan Anfield-ah coaching lam a luhchilh țan ta a, Liverpool legend hian youth team a enkawl a ni. Nikum lam khan League One team MK Dons ațangin Gerrard hian sawmna a dawng a, mahse Gerrard chuan hma a la ti, a zawm duh lo. Lampard pawhin FA hnuaiah Coaching qualifications a bei mek a, engtikah emaw chuan dugouts-ah an la inhmachhawn ngei rin a ni.
Thu lakna : BBC