​France leh Germany inkhelh laia thil thleng rapthlak tak chu

14th November 2015, 03:11PM

Nizan khan Paris-a Stade de France-ah France leh Germany te chuan friendly match an khel a, an inkhelh laiin Stadium pawnah bomb ring takin a puak. He bomb puak ri hi Stadium chhungin atang pawhin a ring hle nghe nghe.

Thihchilh bomb nia sawi a ni a, silai pawh a puak chhunzawm bawk a, he thil thlengah hian mi 120 lai an thi nia tarlan a ni. He thil thlen lai hian France leh Germany te erawh an inkhel chhunzawm zel a, si hnih faiin France chuan hnehna an chang a, Giroud chuan 45th mins-ah goal a khung a, hun tawp dawn minute 4 la awmin Gignac chuan goal khat a khung leh a ni.

Stadium chhunga awm ten pawn lam chanchin an hrechiang chiah chu chhuah chi hi a ni hrih lo. Security lamten Stadium chhunga awm hrih turin an ti a. Football fans-te chu mual chhungah an chhukthla. A ralmuang tawh e tih hnuah an chhuak ta hlawm a ni. He match hi France president Francois Hollande pawhin a en a, ani pawh venhimna chhah tak hnuaiah Stadium a chhuahsan thei chauh bawk a ni.

He thil thleng hian khawvel a deng chhuak nghal a, he thil thlen hma hian Paris Hotel-a Germany team thlengte chu bomb puak thei hlauhthawn thilah an sawn chhuak nghe nghe bawk a. Thawhlehni lo awm turah France hian Wembley Stadium-ah England an tlawh dawn a, he friendly match khelh tur pawh hi thulh a ni mai thei bawk a ni.

Paris hi a him lo nia ngaih a ni chho mek a, misualte tum ber a ni mek niin a lang. Nakkum European Championship khelhna tur France hi he thil tha lo tak thleng hian a nghawng ngei a rinawm bawk a ni.

Copyright © inkhel.com 2024. All rights reserved.