Fortnite kheltu maktaduai 125 an tling tawh

21st September 2018, 10:09PM

Video games pakhat Fortnite chu khawvela games lar ber pawl a ni mek a, khawvel hmun hrang hranga he game kheltu hi maktaduai 125 vel zet an tling tawh a ni.

Fortnite game developer Epic Games chuan an game siam kheltu hi tlakhniam lam pan loin an la pun belh zel thu an sawi a, August thla kha kheltu that ber tum nia an hriat thu sawiin, battle royale game khel turin khawvel ram hrang hrang atangin mi maktaduia 78.3 zet an lut niin an sawi.

September 2017 khan he game hi an tlangzarh tan chauh a, a kum khatna tlinnaah maktaduai 125 vel zetin an khel tling tawh a, an la pun belh zel a rinawm hle bawk a. Kumin June thla khan he game kheltu hi maktaduai 125 an tling tawh a, thla tin hian maktaduai 40 vel bawr chuan an khel ziah nia hriat a ni.

August thlaa khati taka kheltu an tam chho mai kha Android phone atanga khelh theiha an tih tawh vang niin an hria a. Android mai bakah hian console, iOS device leh PC atang tein a khelh theih bawk a. Tin, he game hi man chawi miah loa download theih a ni a, hei vang hian kheltu pawh an tam theih phah nia ngaih a ni bawk a. Game chhungah hian thil lei neuh neuh tur an dah a, hemi atang hian developer te chuan hlawkna an hmu thei ve a ni.

An tlangzarh tirh atanga tun thlenga Fortnite sum lakluh tawh hi $1.2 billion vel bawr niin an chhut a, May thla khan he game hian $318.3 million ngawt mai a la lut a, Superdata chuan a thlawna game khelh theih zingah thla khat chhunga sum la lut hnem ber a nih thu an sawi.

May thlaah $318.3 million zet a lut a, hemi hnu hian a tlahniam leh a, mahse Android version an tlangzarh zui leh avangin August thlaah kheltu an pung leh hluai mai a, hei vang hian sum lut pawh a tam tham viau tura ngaih a ni.

Chinese technology giant Tencent chuan $8 billion man nia chhut Epic ah hian 40% share an nei a, tunah hian China rama Fortnite khelh theih a nih nan theihtawp chhuahin hma an la mek a. Mi thiamte chuan kumin kum tawpah chuan Fortnite hian $2 billion a lakluh hman an ring a ni.

He game hi mi chi hrang hrangin an khel nasa a, a khel tawh vekte chuan an atchilh viau zel a. Milar pawhin an khel fur a, Drake te, Dele Alli te, Antoine Griezmann te chuan he game a chak lawmna atana an lam dan ‘Take the L’ chu an ti ve thin a ni.

Khawvela Fortnite player tha ber pawla sawi, Tyler ‘Ninja’ Blevins chuan YouTube-ah subscriber maktaduai 18 zet mai a nei tawh a, Tyler hi esports star zingah chuan ESPN magazine kawma lang thei hmasa ber a ni a, tun thla issue kawmah a thlalak an tarlang a ni.

Copyright © inkhel.com 2024. All rights reserved.