Formula One khawvel chu tlemin a zim leh sawt dawn a nih hmel hle a, Silverstone neitute chuan British Grand Prix nghah tawh loh an rel a, an titawp a nih chuan kum sarih chhunga an hlawkna hmuh tur chu £46.9 million zet a nih tur thu an sawi.

1950 atanga an tan British GP hi F1 intlansiak upa ber a ni a, kum 31 chhung chu Silverstone-ah hian an nei tawh a. Helai hmun hi British Racing Drivers Club (BRDC) ta niin, lirthei hmanga infiamnaa tel thin mi 850 zet an inphuarkhawm a, heng zingah hian Nigel Mansell leh Lewis Hamilton te pawh an tel.

Nikum July thla khan BRDC chuan an contract neih lai chu en thain, Silverstone-ah hian 2019 hnuah chuan British GP hi neih tawh loh an titlu a. Hetiang thutlukna an siam chhan hi sum leh pai an neih loh vang niin an sawi a. British GP hi ticket hralhna atanga sum lutah chauh an innghat a, hemi hmang hian senso tul ang angte leh F1 thlen man £16.2 million te chu an semrual thin a. Kum 5 chhungin £51.7 million zet an hloh tawh niin BRDC chuan an sawi.

Nikum khan BRDC hian thuchhuah siamin, “British GP kan thleng tawh dawn lo chu a pawi kan ti tak zet a, mahse a tel loin Silverstone hma lam hun hi a eng zawk si a ni,” tiin an tarlang.

Silverstone-ah hian intlansiak leh thil dang tenau zawk an thleng ve reng bawk a, heng atangte hian pawisa an lalut tha thawkhat niin BRDC chuan an sawi a. F1 vangin 2015 khan £2.8 million an hloh bakah 2016 ah phei chuan £4.8 million zet an hloh tih an sawi a. Event tenau zawkte chu F1 aiin an hlawkpui daih zawk tih an sawi bawk.