Vijay Mallya chu Force India director a nihna atangin a bang a, Silverstone team principal erawh a la ni reng thung ang.
Mallya hian Force India director nih chhunzawm a tum ta lo a, a hmun ruak luah tur hian a fapa Siddarth chu a ruat an ring a, thu chiang erawh engmah a la awm lo thung a. Hetianga ban a duh chhan chu ama mimal thila rilru pek a duh vang nia sawiin, team chu a nghawng tel loh a beisei thu a sawi.
“Director ni tawh lo mah ila team principal chu ka la ni zel dawn a. Bang tur hian tumahin min nawr lo a, keima duh thu ngeia bang ka ni a, ka fapa hian ka ai awh se ka duh vanga hmun kian ka ni pah bawk,” tiin Mallya chuan a sawi.
“Keima mimal thil buaipui tur ka ngah si a, ka indaihloh avanga company in a tawrh ka duh lo a, ka aia ka fapa a awm chuan engkim a fuh vek zawk dawn a ni,” a ti bawk.
Tun hnaia Force India hralh tum anga thu a thang chiam chu ninawm a tih thu sawiin, hei hi chu thu belh chian dawl lo mai a nih thu a sawi.
Mallya chuan, “Mi hi an tawng peih si a, thil hi an sawi an sawi a, thuthang rintlak lo mai mai a ni hlawm,” a ti a.
A sawi zelnaah, “Hetiang hi F1 khawvel kalphung a ni ve si a. Kum tam tak kalta atang khan Force India sum dinhmun chungchang hian sawi a hlawh hle a. Ka hralh dawn leh dawn loh lampang pawh a ni lo, kan team sum dinhmun hi chi hrang hrangin miin an sawi duh hle ringawt,” a ti bawk.
“Mi hian an rin thu an sawi vak vak a, kan team hi hralh ka tum thu khawiah mah ka la puang chhin lo hrim hrim a. Tunah tak phei chuan a tha thei ang bera chet kan tum a, hei bak vei em em kan nei lo a. Tun aia sponsor thahnem zawk neih dan te kan ngaihtuah nasa hle a. Team-ah hian keimah chauh ka ni lo a, shareholder pathum kan awm tih hi lo hre theuh rawh se,” tiin Mallya hian a sawi.
“Kan team hi tu emawin an beisei a nih a, pawisa tam tham deuh nen min rawn dawr te a nih chuan shareholder te hian kan la ngaihtuah ve ang chu,” tiin Force India hralh mai a tum loh thu a sawi.
Vijay Mallya hian Mercedes in Force India nen an inzawmna an tinghet zel dawn nia an sawi chungchang a sawi fiah a. Mercedes hian Force India hi engine leh gearbox an siamsak a, hei hi chhunzawm zel an tum niin an sawi a. Hei bakah hian Mercedes chuan B-team atan an hmang dawn nia sawi a awm bawk.
Hemi chungchangah hian Mallya chuan, “Mercedes nen hian kan la indawr lo hrim hrim a, keiniin kan la be lo a, anni lahin min la rawn pan bik lo chu ania. Titi mai mai paha hetiang lampang sawi chhuah hi a la awm lo hrim hrim,” a ti.