05 Sep 2017 11:45

digimalt

​Football kan pet, kan en, kan sawiho

Chawfak hun a ni a, Thanga leh Mawia te chu thlam lamah chawfun ei turin an lut. Thanga chuan a chawfun phawrh mawlh mawlh chung chuan, "Chelsea-in Matic kan chhuah hi chu a pawi hi ka ti vawng vawng khawp mai. Bakayoko hi ka beisei sang khawp mai, hetih lai hian a season khatnaah hian a chetbuai chuan kan buai ve hle maithei a ni, Kante inhliam palh phei selang chuan kan midfield chu a buai khawp ang le," a ti mawlh mawlh a.

Mawia chuan, "Keini pawh hi players kan lalut mang bawk si lova, Kane hi chu a tha thlawt alawm, mahse player ho hi an la naupang hlawm khawp mai a, club dang an inla tha nasa bawk si nen, season hmasa kan tluk loh palh ka hlau khawp mai," a ti ve mawlh mawlh a.

Mizoram kilkhawr ber thlengin Cable TV kan en thei tawh, Mizo chanchinbu darhzau ber Vanglaini pawhin Mizoram dung leh vang a dap chhuak bawk, a khaw kilkhawr ber thlengin European Football chu thalaite titi a ni kan ti thei awm e.

Mizorama internet a la that tak tak hma phei kha chuan zan rei inkhel en hman loh leh results hriat tak lohte hriat tumin ESPN Sports Centre te kha kan chang a, CNN leh BBC Sports News te khan en a hlawh hle nghe nghe a nih kha. Weekend-ah kan tan team an chak, an inkhelh dan zawng zawng kan en chhuakin kan hre chiang, chuti chung chuan thawhtanni Vanglaini chhiar kan han nghakhlel em em thin kha a ni a.

Mizoramah a mi nawlpuiin TV kan la neih tak tak hma phei kha chuan Pu Mamuana buatsaih Sports Weekly leh SoccerMania te kha a ngaihnawm thin khawp mai. Tin, Y2Goal a rawn tichhuak chhunzawm bawk a, chhiar a va nuam thin tak em! In tin deuhthawin TV kan kawl hnu, mahse Internet kan hman tak tak hma kha chuan Radio te kha kan ngaithla nasa a, karen a awm lo, inkhel a en theih loh, World Space radio-ah hian BBC radio kan han herhchhuak ngei a, an inkhel live commentary pawh kha kan ngaithla thap zel a nih kha. An inkhel en ai pawh khan kan mitthlaah khan a chiang emaw tih mai tur kha a ni thin a.

Vawiinah chuan thil a danglam zo ta, Zoram khaw kil ber thlengin internet kan hmang thei ta, an inkhel kan en hman loh te pawh results awlsam tak takin kan hre thei ta zung zung. Kum reilote chhungin thil hi a danglam chak kher mai. Google hmangin results a en zung zung theih tawh. Tin, phone application tha tak tak a awm tawh bawk nen, heti chunga inkhel member-te in active em em mai hi mak kan ti thin.

Inkhel admin te pawhin mak kan tih thu hi kan lo sawi kan lo sawi ve thin, ni ta bera kan hriat chu, kan tan zawngte an han chak a, chak lo team tantu kan thiante va sms ringawt ai chuan public deuh zawka han infiamte hi a lo nuam em em a, chuvang chu ni ta ber hian kan hria. Tin, internet chak loh chang hian facebook-a luh erawh a lo awlsam phian thin a, applications thenkhat load zawh loh chang a neih thin avanga facebook page lama results rawn bih te pawh hi in awm thin niin kan hre bawk.

2010 kum tawp lam atang khan vawiinni thlengin Pathian awmpuina azarah inkhel.com chu kan la kal tluang ve zel chu a ni a, inkhel admin-te ngei pawh hian admin dangte live text chhiar chang kan ngah ve khawp mai. Santosh Trophy-a kan champion tum khan, North East Qualifying kha AR Lammualah khelh a nih kha. Siaha-a kan zin; kan hawng mek, Mizoram leh Manipur an inkhel, a hmuna en ka chak em em, mahse ka thlen hman ka ring si lo.

Mizoram kha an qualify ring viau mah ila Manipur kha team tha tak an nih avangin vanduaina a thleng thei tih hre reng chungin rilru hah deuhin zinkawng ka hmang. Khaw kar kawngah chuan internet a mumal si lova, internet a awm veleh inkhel live text ka bih phei zauh zauh a, motor chhungah chuan ka han au leh thawt thin a. Aizawl kan thleng, khua a thim tawh, inkhel an la zo lo deuh, chak dawn leh dawn loh a hriat lo. AR Lammual zawn kan thlen chuan ka chhuk daih ang tiin rilru ka siam, mahse traffic a tawt lutuk avangin traffic police te chuan Lammual hnuai Tuithiang kawngah min tlan tir ta daih si a.

Inkhel a la zo lo deuh, Tuithiang kan tlan mek, AR Lammual a lo eng ut mai a, chutah Tuithiang Taxi Stand kan thleng tih chuan mipui an au ta dur dur mai a, "E he.. kan chak a nih chu," tiin motor chhungah chuan kan te ve ta chel chul kha a ni a. Hemi ka'n sawichhuah chhan pawh; Football hi tui tak tak chuan a hmuna en thei lo pawh ni mah ila, live commentary emaw live text emaw pawh hi a hmuna awm ang chiahin a ngaihthlakin a chhiar theih hi a lo ni a.

I-League te pawh kha Rajiv Gandhi Stadium-a inkhel zawng zawng kha admin te chuan kan la cover tluan zak, chiang takin a hmunah inkhel en mah ila All India Radio, Aizawl-in live commentary a pek chhuahte kha kan ngaithla reng zel bawk a. Football hi a hmuhnawm a, a ngaihnawm a, sawi ho a nuam a, mittui a sur tir thei a, hlim leh lawm takin min lam tir thei bawk a, tin a hlutna em em pakhat bawk chu inhre ngai miahlo te pawh thian tha tak takah min siam thin a, inpumkhatna a thlen thei hial a ni.